އިސްކޮޅުން އެންމެ ކުރު ފިރިހެނާގެ ރެކޯޑް އާ މީހަކަށް ލިބިއްޖެ އެވެ.
ގިނިސް ވޯލްޑް ރެކޯޑުން ބުނި ގޮތުގައި އެ ރެކޯޑްގެ ހައްގުވެރިޔަކީ މިހާރު، އިރާނަށް އުފަން 20 އަހަރުގެ އަފްޝީން އިސްމާއީލެވެ. ކުރިން އެންމެ ކުރު ފިރިހެނާގެ ރެކޯޑް އޮތީ ކޮލަމްބިއާގެ 36 އަހަރުގެ އެޑްވަޑް "ނީނޯ" ހެނަންޑޭޒަށެވެ. ނަމަވެސް އޭނަ އަށް ވުރެ އަފްޝީން 7 ސެންޓިމީޓަރު (2.7 އިންޗި) ކުރެވެ. އަފްޝީންގެ އިސްކޮޅަކީ 2 ފޫޓް 1.6 އިންޗި (65.24 ސެންޓިމީޓަރު) އެވެ.
ގިނިސް ވޯލްޑް ރެކޯޑުން ބުނީ އަފްޝީނަށް އެންމެ ކުރި ފިރިހެނާގެ ރެކޯޑް ރަސްމީކޮށް ކަށަވަރުވީ އޭނަ ދުބާއީ އަށް ގެންގޮސް ތިން ފަހަރެއްގެ މަތިން އިސްކޮޅު ބަލައިގެން ކަމަށެވެ. އަދި މި ދަތުރުވީ އަފްޝީނަށް ވަރަށް ހާއްސަ ކަމަށެވެ. ސަބަބަކީ ދުނިޔޭގެ އެންމެ އުސް އިމާރާތް، ބުރުޖް ހަލީފާ ވެސް ބަލާލަން ދިއުމުގެ ފުރުސަތު ލިބުމެވެ.
We're delighted to introduce you to the world's NEW shortest living man, Afshin Ghaderzadeh! 🙌
Afshin was measured at our offices in Dubai, UAE earlier this week at 65.24 cm (2 ft 1.6 in) ✨https://t.co/eCaRi3lpuO
— Guinness World Records (@GWR) December 15, 2022
އަފްޝީންގެ ބައްޕަ ބުނި ގޮތުގައި ދަރިފުޅުގެ އިސްކޮޅުގެ ކުރުމަކާ ހެދި ސްކޫލަކަށް ގޮސް ކިޔެވުމުން މަހުރޫމުވި ނަމަވެސް ޖިސްމާނީ ގޮތުން ހުރި އުނިކަން ފިޔަވައި އޭނަގެ އެއްވެސް މައްސަލައެއް ނެތެވެ. ރަސްމީ ތައުލީމުން މަހުރޫމު ވިޔަސް، އަފްޝީނަކި އަމިއްލަ އަށް ލިޔަންކިޔަން ދަސްކޮށްފައިވާ ޒުވާނެކެވެ.
އަފްޝީން ކިޔައިދިން ގޮތުގައި އޭނަ އާންމުކޮށް ކުޅޭ ކަމަކީ ކާޓޫން ބެލުމާއި ސްމާޓްފޯނުން ސޯޝަލް މީޑިއާ އިން ވާނުވާ ބެލުމެވެ. އަދި ފުޓްބޯޅަ އަކީ ވެސް އޭނަ ވަރަށް ލޯބިކުރާ ކުޅިވަރެކެވެ. އެގޮތުން އެންމެ ސަޕޯޓްކުރާ ކުޅުންތެރިންނަކީ ޕޯޗްގަލްގެ ކްރިއަސްޓިއާނޯ ރޮނާލްޑޯ އާއި އިރާންގެ ކުރީގެ ތަރި އަލީ ދާއީ ކަމަށް ބުންޏެވެ.
ދުނިޔޭގެ އެންމެ ކުރު އަންހެނަކީ އިންޑިއާގެ ޖިއޯތީ ކިޝަންޖީ އަމްގީ، 28، އެވެ. އޭނަގެ އިސްކޮޅަކީ 2 ފޫޓް 3.4 އިންޗި (63 ސެންޓިމީޓަރު) އެވެ.