ރާއްޖޭގެ ޓޫރިޒަމް ދާއިރާ އަށް މި އަހަރު 50 އަހަރު ފުރުމާ ގުޅިގެން "ދިވެހިރާއްޖޭގެ ފަތުރުވެރިކަމުގެ ރަން ފަންސާސް" ގެ ނަމުގައި ޑިޖިޓަލް ފޮތެއް ޓޫރިޒަމް މިނިސްޓްރީން އިފުތިތާހުކޮށްފި އެވެ.
އެ ފޮތް އިފުތިތާހުކޮށް ދެއްވީ މައިޒާން އުމަރު މަނިކެވެ.
"ދިވެހިރާއްޖޭގެ ފަތުރުވެރިކަމުގެ ރަން ފަންސާސް" ފޮތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހުގެ ހިތޯބެއް ވެސް ހިމެނެ އެވެ.
On 29th Dec @MoTmv published its Golden Year @MvTourism50 special publication e-book #DhivehiRaajjeyge #FathuruverikamugeRanFansaas. The book was unveiled by Mr. Maizaan Umar Maniku, who was engaged in resort and safari_vessel development in the early years of #Maldives tourism pic.twitter.com/8bgugnAJEs
— Ministry of Tourism (@MoTmv) December 30, 2022
އެ ފޮތުގައި ރާއްޖޭގައި 1972 ގައި ޓޫރިޒަމް ތައާރަވުމާއި އަދި އޭގެ މުހިންމު ބައިވެރިންނާއި އެ ދާއިރާ ތަރައްގީވެ ކުރިއަރަމުން އައި ގޮތާއި ސަރުކާރުގެ ދައުރާއި ރާއްޖޭގެ އިގުތިސާދުގައި ޓޫރިޒަމް ދާއިރާގެ ދައުރު ހިއްސާކޮށްފައިވެ އެވެ. އަދި އެ ދާއިރާ އަށް ފާއިތުވި ބައި ގަރުނުގެ ތެރޭގައި އައި އިންގިލާބީ ބަދަލުތަކާއި ޓޫރިޒަމް ދާއިރާއާ ގުޅުން ހުރި ބިޔަ ބޮޑެތި މަޝްރޫއުތަކާއި އެ ދާއިރާ ދެމެހެއްޓުމަށް ކުރިއަށް އޮތް ޖީލުތަކުގެ ޒިންމާ ފަދަ ބައިތައް ވެސް ފޮތުގައި ހިމަނާފައިވެއެވެ.
ރާއްޖެ އަކީ މިހާރު މުޅި ދުނިޔެ އަށް ބަލާ އިރު ވެސް، ޓޫރިޒަމްގައި އެންމެ ނަގާކިޔާ، އެންމެ މަޝްހޫރު އެއް މަންޒިލެވެ. އަދި މިއީ މިހާރު ރާއްޖޭގެ އިގުތިސާދުގެ މައި ނާރެވެ.
ރާއްޖޭން މިހާތަނަށް ޓޫރިޒަމް ދާއިރާ އިން ބޮޑެތި ކާމިޔާބީތައް ހޯދާފައިވާ އިރު، މި އަހަރު 1.6 މިލިއަން ޓޫރިސްޓުން ގެންނަން ހިފި އަމާޒު ވެސް މި މަހުގެ 20 ގައި ވަނީ ހާސިލުވެފަ އެވެ. އަދި މާދަމާ ފެށޭ އާ އަހަރާ އެކީ ސަރުކާރުގެ އަމާޒަކީ އަހަރު ނިމޭ އިރު މަދުވެގެން 1.8 މިލިއަން ޓޫރިސްޓުން ރާއްޖެ ގެނައުމެވެ.