މިހާތަނަށް ރާއްޖޭގެ ޓީވީ ޗެނަލަކުން ބާއްވާ އެންމެ އަގުބޮޑު ޤުރުއާން މުބާރާތް ރާއްޖެ ޓީވީން ގެނެސްދޭ ގޮތަށް ހަމަޖެހިއްޖެ އެވެ.
"ރަން ތާޖު" ގެ ނަމުގައި ކުރިއަށް އޮތް ރޯދަ މަހު ގެނެސްދޭން ނިންމާފައިވާ މި މުބާރާތް ބާއްވަނީ އިސްލާމިކް މިނިސްޓްރީ އާއި ޔޫތު މިނިސްޓްރީ ގުޅިގެންނެވެ. އެގޮތުން މުބާރާތުގެ އެއްބަސްވުމުގައި މިއަދު ވަނީ ސޮއި ވެސް ކޮށްފަ އެވެ. އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަހުމަދު ޒާހިރު އަލީ އެވެ. ޔޫތު މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަހުމަދު މަހްލޫފެވެ.
"ރަން ތާޖު" މުބާރާތަކީ 300،000ރ. ގެ މުބާރާތެކެވެ.
ޔޫތު މިނިސްޓްރީއާއި އިސްލާމިކް މިނިސްޓްރީ އަދި ރާއްޖެ ޓީވީ ގުޅިގެން ރާއްޖޭގައި މިހާތަނަށް ބާއްވާ އެންމެ ބޮޑު އަދި އެންމެ އަގު ބޮޑު ޤުރުއާން މުބާރާތް ”ރަން ތާޖު“ލޯންޗު ކުރުމުގެ ރަސްމިއްޔާތުގެ ތެރެއިން pic.twitter.com/LJoavVy9Tu
— Ministry of Islamic Affairs (@MVIaffairs) January 2, 2023
މި މުބާރާތަށް ބައިވެރިން ހޯދަން ހަމަޖެހިފައި ވަނީ ރާއްޖޭގެ 10 ސަރަަޙައްދެއްގައި އޮޑިޝަންތައް ބާއްވައިގެންނެވެ. އެގޮތުން 20 ބައިވެރިޔަކު އޮޑިޝަނުން ހޮވާނެ އެވެ. މުބާރާތް ހާއްސަކޮށްފައި ވަނީ އުމުރުން 16-45 އަހަރާ ދެމެދުގެ މީހުންނަށެވެ.
މުބާރާތުގައި ބައިވެރިވުމަށް ބޭނުންވާ މީހުންނަށް މިހާރު ވަނީ އެސްއެމްއެސް އަށް ހުޅުވާލައިފަ އެވެ. މެސެޖް ކުރަން ޖެހޭ ގޮތަކީ އާރްޓީ ސްޕޭސް، ފުރިހަމަ ނަން، އުމުރު، އައިޑީ ނަންބަރު ޖެހުމަށް ފަހު، 450 އަށް ފޮނުވާނީ އެވެ.
"ރަން ތާޖު" ގެ އޮޑިޝަން ކުރިއަށް ގެންދާނީ މާލެ، އައްޑޫ، ފުވައްމުލައް، ގދ ތިނަދޫ، ލ ގަން، ދ ކުޑަހުވަދޫ، އއ. ރަސްދޫ، ބ އޭދަފުށި، ށ ފުނަދޫ، އަދި ހދ ކުޅުދުއްފުށި އަދި މާލޭގަ ވެ. އޮޑިޝަންތައް ކުރިއަށް ގެންދާނީ މި މަހުގެ 15 އިން އަންނަ މަހުގެ 15 އަށެވެ.