ބައެއް ސިޔާސީ ލީޑަރުން ސިޔާސީ ބޭނުމަކަށް ޗައިނާއާ ދިމާލަށް އެއްޗެތި ގޮވާގޮވުން ހުއްޓާލަންޖެހޭ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް ކުރެއްވި ޓްވީޓެއްގައި ވިދާޅުވީ ޗައިނާގެ މާކެޓް ހުޅުވި މި މަހު 18 ގައި ރާއްޖެއަށް ޗައިނާގެ ފަތުރުވެރިން އަންނަން ފަށާނެ ކަމަށެވެ.
ޗައިނާގެ ފަތުރުވެރިންނާއެކު ރާއްޖޭގެ އިގްތިސާދަށް އާ ދިރުމެއް އަންނާނެ ކަމަށް ޝަރީފް ވިދާޅުވިއެވެ. އަދި އިގްތިސާދީ ކުރިއެރުން ހަލުވި ވެގެންދާނެ ކަމަށްވެސް ވިދާޅުވިއެވެ.
"ބައެއް ސިޔާސީ ލީޑަރުން ޗައިނާއާ ދިމާލަށް، ސިޔާސީ ބޭނުމަށް އެއްޗެތި ގޮވުން ހުއްޓާލަން އެބަޖެހޭ." ޝަރީފުގެ ޓްވީޓުގައިވެއެވެ.
China market hulhuvi mi mahu 18 ga alun tourist annanfesheemaa Raajje ge iguthisaadhah aa dirumeh annaane. Adhi igthisaadhee kuri erun haluvivegen dhaane. Baeh siyaasee leaderun China aa dhimaakah siyaasee beynumah echethi govun huttaalan eba jehey.
— Ibrahim Shareef (@AdduShareef) January 7, 2023
ޗައިނާއަށް އެންމެ ބޮޑަށް ފާޑުކިޔުން އަމާޒުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި، އޭރު އިދިކޮޅުގައި އޮތް މިހާރުގެ ވެރިކަން ކުރާ ކޯލިޝަންގެ ފަރާތުންނެވެ. އަދި ސަރުކާރު ބަދަލުވުމަށްފަހު ޗައިނާގެ ދަރަނި ކުޑަނުކުރާ މައްސަލައިގައި އަދި ޗައިނާއަށް ބޮޑު ދަރަންޏެއް ދެއްކުމުގައި ލުއި ގޮތްތަކެއް ހޯދައިނުދޭތީ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ފާޑުކިޔުން ޗައިނާއަށް އަމާޒުވެއެވެ.