އިންޑިއާގައި ހުންނަ ބީބީސީގެ އޮފީސްތައް އެ ގައުމުގެ ޓެކްސް އިދާރާ އިން މިއަދު ފާސްކުރަން ފަށައިފި އެވެ.
މިކަމާ ގުޅިގެން އިނގިރޭސިވިލާތުގެ ބީބީސީ ނެޓްވޯކުން ނެރުނު ކުރު ބަޔާނެއްގައި ބުނީ އޮފީސްތައް ފާސްކުރި ނަމަވެސް ކަންބޮޑުނުވާ ކަމަށާއި އެކަމަށް ދޭން ޖެހޭ ހުރިހާ އެއްބާރުލުމެއް ވެސް ދޭނެ ކަމަށެވެ.
"އަދި މިކަމަށް އަވަސް ހައްލެއް އަންނާނެ ކަމަށް ވެސް އުންމީދުކުރަން." ބީބީސީން ބުންޏެވެ.
BBC offices in India searched as part of investigation by income tax authorities – the corporation says it is "fully co-operating" https://t.co/kCLNA8yU4P
— BBC Breaking News (@BBCBreaking) February 14, 2023
އެ ނެޓްވޯކްގެ އިންޑިއާގެ އޮފީސްތައް ފާސްކުރަން ކުރަން ފަށާފައި މި ވަނީ އިންޑިއާގެ މިހާރުގެ ބޮޑުވަޒީރު ނަރެންދުރަ މޯދީއާ ގުޅޭ ގޮތުން މިދިޔަ މަހުގެ ތެރޭގައި ބީބީސީން ގެނެސްދިން ޑޮކިއުމަންޓަރީއެއްގެ މައްސަލާގައި އިންޑިއާ ސަރުކާރުން ބީބީސީ ދެކެ ރަތަށް އަރާފައި ވަނިކޮށެވެ.
މޯދީއާ ގުޅޭ ގޮތުން ގެނެސްދިން ޑޮކިއުމަންޓަރީގައި މައިގަނޑު ގޮތެއްގައި އަލިއަޅުފާފައި ވަނީ އޭނަ ގުޖުރާތުގެ ޗީފް މިނިސްޓަރަކަށް ހުންނެވި ދުވަސްވަރު 2002 ގައި މުސްލިމުންމާ ދެކޮޅަށް ހިންގި ޖަރީމާތަކަށެވެ. މި ޑޮކިއުމަންޓްރީގެ އިންޑިއާގައި ދެއްކުން މަނާކުރަން ވެސް ސަރުކާރުން މަސައްކަތްކޮށްފައިވެ އެވެ.
ބީބީސީގެ އިންޑިއާގެ ޓެކްސް އޮތޯރިޓީގެ އޮފިޝަލުން ވަދެ ފާސްކުރުން ފެށުމާ ގުޅިގެން އެޑިޓާސް ގިލްޑް އޮފް އިންޑިއާ އިން ކަންބޮޑުވުން ފާޅުކޮށް މިއީ މީޑިއާތަކަށް ބިރުދެއްކުމުގެ އަމަލެއްގެ ގޮތުގައި ސިފަކޮށްފައިވެ އެވެ.