ދައުލަތަށް ގިނަ ދުވަހު ހިދުމަތްކުރައްވާފައިވާ ކުރީގެ މިނިސްޓަރު އުމަރު ޒާހިރު އޮފީހުގެ ނަމުން ނަން ދީފައިވާ ސަރުކާރުގެ އާ އޮފީސް އިމާރާތް މިއަދު ރަސްމީކޮށް ހުޅުމާލޭގައި ހުޅުވައިފި އެވެ.
ޓްރީ ޓޮޕް ހޮސްޕިޓަލް ކައިރީގައި ހަދާފައިވާ މި އޮފީސް ހުޅުވަން ބޭއްވި ރަސްމިއްޔާތު ޝަރަފުވެރިކޮށް ދެއްވީ ރައީސް އިބްރާހީމް މުހައްމަދު ސޯލިހެވެ. އެ ރަސްމިއްޔާތުގައި ސަރުކާރުގެ އިސްވެރިންނާއި އުމަރު ޒާހިރުގެ އާއިލާގެ ބޭފުޅުންތަކެއް ވެސް ބައިވެރިވެވަޑައިގެންނެވި އެވެ. ރަސްމިއްޔާތުގައި ރައީސް ވަނީ އޮފީހުގައި ގައުމީ ދިދަ ނަންގަވައި ދެއްވައިފަ އެވެ.
"އުމަރު ޒާހިރު އޮފީސް" ބިލްޑިން އަކީ ސަރުކާރުގެ އޮފީސްތައް އަމިއްލަ މީސްމީހުންގެ އިމާރާތްތައް ކުއްޔަށް ނައިގެން ހިންގަން ޖެހޭތީ ދިމާވެފައިވާ ދަތިތަކަށް ހައްލެއް ހޯދުމުގެ ގޮތުން އިމާރާތްކުރި ތަނެކެވެ. އަދި މިއީ ހުޅުމާލޭގައި ސަރުކާރުގެ އޮފީސްތަކެއް ހިންގަން އިމާރާތެއް ހަދައި ހުޅުވި ފުރަތަމަ ފަހަރު ވެސް މެ އެވެ.
— The President's Office (@presidencymv) February 15, 2023
އެހެންވެ 185 މިލިއަން ރުފިޔާ ހަރަދުކޮށްގެން ހެދި އިމާރާތުގެ ސަބަބުން ކުއްޔަށް ނަގައިގެން ސަރުކާރުގެ އޮފީސްތައް ހިންގަން ފެށުމުން އަމިއްލަ މީސްމީހުންގެ ތަންތަނުގައި ކުއްޔަށް އޮފީސްތައް ހިންގުން ނިމުމަކަށް އަންނާނެ ކަމަށް މިއަދުގެ ރަސްމިއްޔާތުގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވި އެވެ.
This morning, President @ibusolih officially inaugurated the Umar Zahir Office Building in Hulhumalé. The six-story office complex features 25,000 sq. ft. office space on four floors and would see the relocation of three government ministries. pic.twitter.com/b368oWJfwm
— The President's Office (@presidencymv) February 15, 2023
އެ އިމާރާތަށް ޖެންޑަ މިނިސްޓްރީ ދާދި ފަހުން ބަދަލުކޮށްފައިވާ އިރު، ވަރަށް އަވަހަށް ޓްރާންސްޕޯޓް މިނިސްޓްރީ އާއި ހަޔަ އެޑިއުކޭޝަން މިނިސްޓްރީ ވެސް ބަދަލުކުރާނެ އެވެ. އަދި ރާއްޖޭގައި އަލަށް ހުޅުވާ އެމެރިކާ އެމްބަސީ ވެސް ހުންނާނީ މި އިމާރާތުގަ އެވެ.
ސަރުކާރު އޮފީސް އިމާރާތުގައި މިނިސްޓްރީތައް ހިންގާނީ ދެވަނަ ފަންގިފިލަ އިން ފަސް ވަނަ ފަންގިފިލައަށެވެ. އިމާރާތުގެ ގްރައުންޑް ފްލޯ އަދި ފުރަތަމަ ފަންގިފިލާ ބޭނުން ކުރާނީ ޕާކިންއަށެވެ. ހަތަރު ވަނަ ފަންގިފިލާ ބޭނުން ކުރާނީ އެމެރިކާ އެމްބަސީންނެވެ. އަދި ހަ ވަނަ ފަންގިފިލާގައި ކުދި މީޓިން ރޫމްތަކާއި ސެމިނާ ރޫމް އަދި ޓެރަހެ ހިމެނެއެވެ.
އިމާރާތުގެ ކޮންމެ ފަންގިފިލާއެއްގެ ބޮޑު މިނަކީ 25،000 އަކަފޫޓެވެ.