އެމްޑީޕީގެ ރިޔާސީ ޓިކެޓް ރައީސް އިބްރާހީމް މުހައްމަދު ސޯލިހާ ހަވާލުކުރަން މިދިޔަ ހުކުރު ދުވަހުގެ ރޭ ބޭއްވި ޖަލްސާ އަށް އެ ޕާޓީގެ ރައީސް މުހައްމަދު ނަޝީދު ވަޑައިނުގަތުމަކީ ވަރަށް ދެރަވަރު ހުތުރު އަމަލެއް ކަމަށް މަރަދޫ ދާއިރާގެ މަޖިލިސް މެމްބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ.
ނަޝީދު ވަނީ ޕްރައިމަރީގައި ރައީސާ ވާދަކުރައްވައި ބަލިވެވަޑައިގަތުމުން ރިޔާސީ އިންތިހާބުގައި ރައީސަށް ތާއީދު ނުކުރަން ވެސް ނިންމަވައިފަ އެވެ. އަދި އެމްޑީޕީގެ ތެރޭގައި "ފިކުރެއްގެ ދިރުން" ގެ ނަމުގައި ވަކި ސިޔާސީ ހަރަކާތެއް ހިންގަވަން މިހާރު ގެންދަވަނީ މަސައްކަތް ކުރައްވަމުންނެވެ.
Democracy ge reethi hamathah qaboolu kuraa komme meehaku inthikhaabegge bali vejje nama bali qaboolu kuraane. Adhi MDP ge Raees magaamuga hunnavaugen, @ibusolih ah ticket haavaalu kurumuge rasmiyyaathah, @MohamedNasheed vadainugathumahee varah dhereavaru huthuru amaleh
— Ibrahim Shareef (@AdduShareef) February 19, 2023
ނަޝީދުގެ މި އަމަލުތަކަށް އިޝާރާތް ކުރައްވައި މަވޯޓާ މިއަދު ވިދާޅުވީ ޕާޓީގެ ރައީސް މަގާމުގައި ހުންނަވައިގެން، ކެންޑިޑޭޓަށް ރިޔާސީ ޓިކެޓް ހަވާލުކުރުމުގެ ރަސްމިއްޔާތަށް ވަޑައިނުގަތުމަކީ ހުތުރު ކަމެއް ކަމަށެވެ.
"ޑިމޮކްރަސީގެ ރީތި ހަމަތައް ގަބޫލުކުރާ ކޮންމެ މީހަކު އިންތިހާބެއްގައި ބަލިވެއްޖެ ނަމަ ބަލި ގަބޫލުކުރާނެ." އޭނާ ވިދާޅުވި އެވެ.
މަވޯޓާ ވިދާޅުވީ އެމްޑީޕީ ވިޔަސް އަދި އެހެން ޕާޓީއެއް ވިޔަސް އެ ޕާޓީގެ ރައީސްގެ މަގާމާއި އެހެނިހެން އިސް މަގާމުތަކުގައި ތިއްބަވާ ބޭފުޅުން ޕާޓީ ކުރިއަރުވައި، ވެރިކަން ހޯދައި ދޭން މަސައްކަތް ކުރައްވަން ޖެހޭނެ ކަމަށެވެ.
"އެ ނޫން ގޮތަކަށް އެކަން ކުރުމަށް އެއްވެސް ޕާޓީއެއްގެ އަސާސީ ގަވާއިދު ތަނެއް ވެސް ނުދޭ." އޭނާ ވިދާޅުވި އެވެ.
MDP viyas adhi ehen party eh viyas party Raees ge magaamaa Party ge ehenihen is magaamu thakuga thibbavaa beyfulhun party kuri eruvumashaa party ah verikan hoadhaidhinumah masakkaiy kuravvan vaane. Enoon gothakah ekan kurumakah evves party egge asaasee gavaaidhu thaneh nudhey
— Ibrahim Shareef (@AdduShareef) February 19, 2023
ރައީސް ވެރިކަމުގެ ދެވަނަ ދައުރަކަށް ވާދަކުރައްވަން އެމްޑީޕީގެ ރިޔާސީ ޓިކެޓް ހޯއްދެވީ ޕްރައިމަރީ އާޒިމް ތާއީދުކުރެއްވި ނަޝީދު ބޮޑު ތަފާތަކުން ބަލިކުރެއްވުމަށް ފަހު އެވެ. ޕްރައިމަރީގައި ނަޝީދަށް ލިބިވަޑައިގަތީ 15،641 ވޯޓެވެ. އެއީ ވޯޓްލީ މީހުންގެ 38.90 ޕަސެންޓެވެ. ރައީސަށް ލިބިވަޑައިގަަތީ 24،566 ވޯޓެވެ. އެއީ ވޯޓްލީ މީހުންގެ 61.10 ޕަސެންޓެވެ.
ޓިކެޓް ހަވާލުކުރަން ބޭއްވި ޖަލްސާގައި ނަޝީދަށް އިޝާރާތް ކުރައްވައި ރައީސް ވިދާޅުވީ ހިޔާލު ތަފާތުވުންތަކެއް ހުއްޓަސް މި ވަގުތަކީ ޕާޓީގެ އެންމެން އެކީގައި މަސައްކަތްކޮށް، ވެރިކަން ހޯދަން މަސައްކަތްކުރަން ޖެހޭ ވަގުތެއް ކަމަށެވެ.