ސްޓޫޑެންޓް ލޯނަށް އެދި ހުށަހެޅުމުގެ ފުރުސަތު ބުދަ ދުވަހު ހަމަވާނެ ކަމަށް ހަޔަރ އެޑިއުކޭޝަން މިނިސްޓްރީން ބުނެފިއެވެ.
މިއަހަރު ސްޓޫޑެންޓް ލޯނަށް ވަނީ 720 ފުރުސަތު ހުޅުވާލާފައެވެ.
ސްޓޫޑެންޓް ލޯނަށް އެޕްލައި ކުރުމުގެ ސުންގަޑިއަކީ 15 މާރިޗު 2023 ވާ ބުދަ ދުވަހުގެ މެންދުރު 01:30 އެވެ.
— Ministry of Higher Education (@MoHEmv) March 11, 2023
މިއަހަރު ޕައިލެޓްކަން ކިޔަވާ ދަރިވަރުންނަށް 60 ޖާގަ ހާއްސަ ކޮށްފައިވާއިރު އެމްބީބީއެސްއަށް ކިޔެވުމަށް 55 ޖާގަ ހާއްސަކޮށްފައިވެއެވެ. މީގެ އިތުރުން މާސްޓާސް ފެންވަރުގައި ޕޯސްޓް ގްރެޖުއޭޓް ކޯސް މެޑިސިން ދާއިރާގައި ހެދުމަށް 20 ޖާގަ ހާއްސަކޮށްފައިވާއިރު ޕީއެޗްޑީ ހެދުމަށް 15 ފުރުސަތު ވަނީ ހުޅުވާލާފައެވެ.
ލޯނަށް ހުޅުވާލާ މީޑިއާއަށް މައުލޫމާތު ދެއްވަމުން ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ، ވަކި ދާއިރާތަކަށް ދޭ ފުރުސަތުތަކުގެ އަދަދު އިތުރު ކުރިނަމަވެސް، ހުރިހާ ދައިރާއަކުންވެސް ކުރިމަތި ލުމުގެ ފުރުސަތު އޮންނާނެ ކަމަށެވެ.