ޓްރާންސެކްޝަން އުސޫލުން ޕާޓީތަކުން ވޯޓް ހޯދަން އުޅުމަކީ ވޯޓް ގަންނަން އުޅުކަމަށް ވިދާޅުވެ، ޕާޓީތަކަށް އެމްޑީޕީގެ ރައީސް މުހައްމަދު ނަޝީދު ފާޑު ވިދާޅުވެއްޖެ އެވެ.
މަޖިލީހުގެ ރައީސްގެ މަގާމުގައި ވެސް ހުންނެވި ނަޝީދު ކުރެއްވި ޓްވީޓެއްގައި ވިދާޅުވީ ސިޔާސީ ޕާޓީތަކުން ރިޔާސީ އިންތިހާބަށް ކުރާ ދަތުރުތަކުގައި ތަންފީޒު ކުރުމަށް ވައުދުވާ ސިޔާސަތުތައް އެކުލަވާލުމަކީ އެންމެ މުހިއްމު ކަންތައް ކަމަށެވެ.
Siyaasee party thakun riyaasee inthikhaab ah kuraa dhathurugai thanfeez kurumah vaudhuvaa siyaasath ekulavaalumakee enme muhinmu eh kanthah. Transactional usoolun vote hoadhan ulhumakee vote gannan ulhun. Alhugandu dhekey gothukgai e ee naakaamiyaab ge aslu.
— Mohamed Nasheed (@MohamedNasheed) March 23, 2023
"ޓްރާންސެކްޝަން އުސޫލުން ވޯޓް ހޯދަން އުޅުމަކީ ވޯޓް ގަންނަން އުޅުން،" އަމިއްލަފުޅު ޕާޓީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހާ ދެކޮޅަށް ހުންނެވި ނަޝީދު ވިދާޅުވި އެވެ. "އަޅުގަނޑު ދެކޭ ގޮތުގައި އެއީ ނާކާމިޔާބުގެ އަސްލު."
މި އަހަރުގެ ރިޔާސީ އިންތިހާބު ސެޕްޓެމްބަރު 9 ގައި ބާއްވަން ނިންމާފައިވާ އިރު، ޕާޓީތަކުން އަންނަނީ އިންތިހާބަށް ތައްޔާރީތައްވަމުންނެވެ. އެގޮތުން ނަޝީދު މިހާރު ގެންދަވަނީ އެ މަނިކުފާނުގެ "ފިކުރެއްގެ ދިރުން" ފެކްޝަނާއި ގާސިމް އިބްރާހީމްގެ ޖުމްހޫރީ ޕާޓީއާ ގުޅިގެން މެނިފެސްޓޯއެއް އެކުލަވާލުމާ ގުޅޭ މަޝްވަރާތަކެއް ކުރައްވަމުންނެވެ.