މިއަހަރު ފުރަތަމަ ތިން މަހު އައި ޓޫރިސްޓުންގެ އަދަދު ބައިމިލިއަނުން މައްޗަށް އަރައިފި ކަމަށް ޓުއަރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
މިއީ މިދިޔަ އަހަރު މިމުއްދަތާއި އަޅާ ބަލާއިރު 91،000 ޓޫރިސްޓުން އިތުރު އަދަދެކެވެ. ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މިމަހުގެ 26 ވަނަ ދުވަހުގެ ނިޔަލަށް 500،597 މީހުން ރާއްޖެ ވަނީ ޒިޔާރަތް ކޮށްފައެވެ. މިދިޔަ އަހަރު މި މުއްދަތުގައި ޒިޔާރަތްކޮށްފައި ވަނީ 409،426 ޓޫރިސްޓުންނެވެ. މިއީ 22.3 އިންސައްތައިގެ ކުރިއެރުމެކެވެ.
މިއަހަރު ޖެނުއަރީ މަހު ރާއްޖެއަށް 172،499 ޓޫރިސްޓުން ޒިޔާރަތްކޮށްފައިވެއެވެ. އަދި ފެބްރުއަރީ މަހު 177،915 ޓޫރިސްޓުން ވަނީ ޒިޔާރަތްކޮށްފައެވެ. މިއީ މިދިޔަ ދެ އަހަރާއި އަޅާ ބަލާއިރު ވެސް އިތުރު އަދަދުތަކެއް ކަމަށް ޓުއަރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.
ރާއްޖެއަށް ބައި މިލިއަން ޓޫރިސްޓުން އައުމާއި ގުޅިގެން ޓުއަރިޒަމް މިނިސްޓަރ މައުސޫމް ވަނީ މިދަނީ މިއަހަރަށް ކަނޑައެޅި އަމާޒާއި އެއްގޮތަށް ކަމަށް ވިދާޅުވެ ސިނާޢަތުގައި މަސައްކަތް ކުރާ ފަރާތްތަކަށް މަރުހަބާ ދަންނަވާފައެވެ.
On track for Target 2023!
Yes we've welcomed over 500,000 tourists in the 1st Quarter of 2023. Congratulations!
Appreciate the contributions & support from tourism industry stakeholders, service providers, kind people of #Maldives and lovely tourists. #TogetherWeCan pic.twitter.com/78Zqm0L2jo— Abdulla Mausoom (@Mausoom_Maus) March 27, 2023
ރާއްޖެއަށް މި އަހަރު މިހާތަނަށް އައި ފަތުރުވެރިންގެ ތެރެއިން މާކެޓުގެ އެންމެ ބޮޑުބައި ހިއްސާ ކުރަނީ 12 އިންސައްތައާއި އެކު ރަޝިޔާ ޓޫރިސްޓުންނެވެ. ދެވަނަ އަށް އެންމެ ގިނަ ފަތުރުވެރިން މިހާރު އަންނަމުންދަނީ މިދިޔަ އަހަރު މާކެޓުގެ އެއްވަނަ ނެގި އިންޑިއާއިންނެވެ. އަދި ކޯވިޑުގެ ކުރީން އެންމެ ގިނަ ޓޫރިސްޓުން އަންނަމުން ދިޔަ ޗައިނާ މިވަގުތު އޮތީ މާކެޓުގެ 8 ވަނައިގައެވެ. ޗައިނާގެ ބޯޑަރު ހުޅުވައި ޓޫރިސްޓުން ޒިޔާރަތް ކުރަން ފެށީ މިއަހަރުއެވެ.
ޓުއަރިޒަމް މިނިސްޓަރީން މިއަހަރު ރާއްޖެއަށް 1.8 މިލިއަން ޓޫރިސްޓުން ގެނައުމަށް ވަނީ އަމާޒު ހިފާފައެވެ. މިދިޔަ އަހަރު ރާއްޖެއަށް 1.6 މިލިއަން ޓޫރިސްޓުން ވަނީ ޒިޔާރަތްކޮށްފައެވެ.