ރާއްޖޭގައި މިހާރު މީހުން މެރުން އާންމުވެއްޖެ ކަމަށާއި ސަރުކާރުން އެންމެ ފުރަތަމަ ކަމަކަށް ކުރަންވީ ރައްޔިތުންނަށް ރައްކާތެރިކަން ހޯދައި ދިނުން ކަމަށް އެމްއެންޕީގެ ލީޑަރު ކާނަލް މުހައްމަދު ނާޒިމު ވިދާޅުވެއްޖެ އެވެ.
ނ. މަނަދޫގައި ދުވަސްވީ އަންހެނަކު މަރާލި ހާދިސާއާ ގުޅިގެން އޭނަ ކުރެއްވި ޓްވީޓެއްގައި ވިދާޅުވީ އެ ހަބަރު އަޑުއެެއްސެވީ ފުން ހިތާމައާ އެކީގައި ކަމަށެވެ.
ނ. މަނަދޫގައި އަނިޔާވެރި ގޮތަކަށް މަރާލަފައިވާ އަންހެނެއްގެ ހަބަރު އަޑުއެހީ ފުންހިތާމައާއެކު. ވީއެންމެ އަވަހަކަށް މިކަން ކުރިބަޔަކު އިންސާފުގެ ކުރިމައްޗަށް ގެނެސް ހައްގު އަދަބު ދީ.
މީހުން މެރުން އާންމުވެއްޖެ. އެންމެ ފުރަތަމަ ކަމަކަށް ރައްޔިތުންނަށް އަމާންކަން ހޯދައިދީ.
— Mohamed Nazim MP (@nazim7878) April 7, 2023
"ވީއެންމެ އަވަހަކަށް މިކަން ކުރިބަޔަކު އިންސާފުގެ ކުރިމައްޗަށް ގެނެސް ހައްގު އަދަބު ދީ،" ނާޒިމު ވިދާޅުވި އެވެ. "މީހުން މެރުން އާންމުވެއްޖެ. އެންމެ ފުރަތަމަ ކަމަކަށް ރައްޔިތުންނަށް އަމާންކަން ހޯދައިދީ."
މަނަދޫ އަންނާރުމާގޭ ނައީމާ މޫސާ، 62، މަރާލި މައްސަލައިގެ ތަހުގީގަށް ފުލުހުންގެ ޓީމަކުން މިހާރު އަންނަނީ އެ ރަށުގައި ހަރަކާތްތެރިވަމުންނެވެ.