ރާއްޖޭގެ ކަނޑުގެ ސަރަހައްދުން ބައެއް ގެއްލުމަކީ ކާމިޔާބީއެއް ނޫން ކަމަށް ވިދާޅުވެ، ޗާގޯސް މައްސަލާގައި ސަރުކާރަށް ކުރީގެ އެޓާނީ ޖެނެރަލް ޑރ. މުހައްމަދު މުނައްވަރު ފާޑު ވިދާޅުވެއްޖެ އެވެ.
މި އަަހަރުގެ ރިޔާސީ އިންތިހާބުގައި ވެސް ވާދަކުރައްވަން ނިންމަވާފައިވާ މުނައްވަރު ކުރެއްވި ޓްވީޓެއްގައި ވިދާޅުވީ ރާއްޖޭގެ އިގުތިސާދީ ސަރަހައްދަކުން ބައެއް ގެއްލުމަކީ ނުވަތަ އުނިވުމަކީ ލިބޭ ކާމިޔާބީއެއް ނޫން ކަމަށެވެ.
"މިކަމުގައި އިހުމާލުވި ފަރާތްތައް ޒިންމާ ކުރުވަން ޖެހޭނެ." އޭނަ ވިދާޅުވި އެވެ.
Qaanoonakun kanda elhifaivaa Dhivehiraajjeyge khaassa iqthisaadhee sarahadhdhun baeh gellumakee nuvatha univumakee libey kaamiyaabeh nooneve. Hithaama ekeve. Mikamugai ihumaaluvi faraaiythah zinmaa kuruvan jeheyne eve
— Mohamed Munavvar (@MMunavvar) April 29, 2023
ރާއްޖޭގެ ދެކުނުން މޮރިޝަސްގެ އުތުރުން ކަނޑުގެ ސަރަހައްދު ގުޅޭ ހިސާބު ކަނޑައެޅުމުގެ މައްސަލާގައި ދެ ގައުމުން ހިޔާލު ތަފާތުވުމުން، އިޓްލޮސް އިން އިއްޔެ ވަނީ ރާއްޖެއަށް ބޮޑުބައެއް ލިބޭ ގޮތަށް އިމުގެ މައްސަލަ ނިންމައިފަ އެވެ. އެގޮތުން ރާއްޖޭގެ ދެކުނު 47،232 އަކަކިލޯމީޓަރުގެ ސަރަހައްދެއް ރާއްޖެއަށް ލިބޭ ގޮތަށް ނިންމާފައިވެ އެވެ. އަދި މޮރިޝަސް އަށް ދޭން ނިންމީ 45،331 އަކަކިލޯ މީޓަރެވެ.
މި ގޮތަށް ނިންމުމާ ގުޅިގެން މިއީ ލިބުނު ވަރަށް ބޮޑު ކާމިޔާބީއެއް ކަމަށް ސަރުކާރުން ވަނީ ބުނެފަ އެވެ.