ޢައްޒާގެ ހާލުގައި ޖެހިފައިވާ މުސްލިމް އަޙްނާއި އުހުތުންނަށް އެހީވުމުގެ ގޮތުން އައްޑޫގެ ސްކޫލްތަކުން ފައިސާ ހޯދުމަށް ތަފާތު ހަރަކާތްތަކެއް ހިންގަމުން އެބަގެންދެއެވެ.
އެގޮތުން އިއްޔެއިން ފެށިގެން ސްކޫލްތަކުންވަނީ އެކި ސަރަހައްދު ތަކުގައިފަންޑް ފޮށި ބަހައްޓާފައެވެ. ފޭދޫ ސްކޫލުން ފޭދޫ ސްކޫލް ސަރަހައްދުގައި ފަންޑް ފޮއްޓެއް ބަހައްޓާފައިވާ އިރު، ހުޅުމީދޫގައި ހުންނަ ސ. އަތޮޅު މަދަރަސާގައިވެސް ވަނީ ފަންޑު ފޮއްޓެއް ބަހައްޓައި އާއްމުންނަށް ފައިސާ ޖަމާ ކުރެވޭނެ އިންތިޒާމް ހަމަޖައްސާފައެވެ.
ހިތަދޫ ހިރާ ސްކޫލާއި، އައްޑޫ ހައި ސްކޫލުންވެސް ވަނީ ފަންޑަށް ފައިސާ ހޯދުމަށް ތަފާތު ހަރަކާތްތަކެެއް ހިންގާފައެވެ. ހިރާ ސްކޫލުން އިއްޔެ ފަންޑު ފޮށި ބަހައްޓައިގެން ފައިސާ ޖަމާކޮށްފައިވާ އިރު މިއަދު އެސްކޫލްގެ 100 އެއްހާ ދަރިވަރުންވަނީ ހިތަދޫގެ ގޭގެއަށް ދޮރުން ދޮރަށް ހިނގައި ފައިސާ ޖަމާކޮށްފައެވެ.
ހިރާ ސްކޫލުން ވަނީ ސައުވީސް ހާސް ހަތަރު ސަތޭކަ ހަތްދިހަ ހަތް ރުފިޔާ ފަންސާސް ލާރި، ދިވެހި މީޑިއާއިން އިސްނަގައިގެން ކުރިއަށް ގެންދާ ހެލްޕް ގާޒާ ތެލެތޯން އަށް ޖަމާކޮށްދީފައެވެ.
ހިތަދޫ ނޫރުލް އިސްލާމް ޖަމިއްޔާ އާއި، ޕާލްސް ޖަމިއްޔާއިން ފަންޑު ފޮށި ބަހައްޓައިގެން ވަނީ ދެ ލައްކައަށް ވުރެ ގިނަ ފައިސާ ހޯދާ، ގާޒާ ފަންޑަށް ޖަމާކޮށްފައެވެ.
ޢައްޒާގެ މުސްލިމް އަޙުނާއި އުޙުތުންނަށް އިޒްރޭލުގެ ޔަހޫދީން ދެމުންގެންދާ ހަމަލާ ކުށްވެރިކޮށް މަރަދޫ އަދި ހިތަދޫގައި ވަނީ ހިނގާލުމެއްވެސް ބާއްވާފައެވެ.