ޖޫން 2 ވަނަ ދުވަހު "ބާނަ ބާނާ ތިއްބާ ތިޔަ ވިއްކާލީ ކަނޑު" ނަމުގައި ކުރިއަށް ގެންދަން އުޅޭ އެއްވުމަކީ ހިންގަންއުޅޭ ބަގާވާތެއް ކަމަށް މަކުނުދޫ ދާއިރާގެ މެންބަރު މުހައްމަދު ރާއީ ތުހުމަތު ކުރައްވައިފިއެވެ.
ރާއްޖޭގެ ދެކުނުގެ މަސްކަނޑުން ބައެއް ގެއްލުނު މައްސަލައިގައި ކަނޑުވިއްކުމާ ދެކޮޅު އިއްތިހާދުން ތައްޔާރުވަމުން އަންނަ ޖަލްސާ ބޭއްވުމަށް ހަމަޖެހިފައިވަނީ 2 ޖޫން 2023 ވާ ހުކުރު ދުވަހުގެރޭ 20:30ގައި ކާނިވާ ސަރައްހައްދުގައެވެ.
މި ޖަލްސާއަށް ތައްޔާރުވަމުން އަންނައިރު، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން މެންބަރު ރާއީ ވިދާޅުވީ 2 ޖޫން ގައި ކުރަން އުޅެނީ ބަގާވާތެއް ކަމަށެވެ.
"ޖޫން 2 ގައި ޗާގޯސް މައްސަލައިގައި ރާއްޖޭގަ ބޮޑު ބަގާވާތެއް ކުރަން އެބައުޅޭ. އެއީ ކަނޑައެޅިގެން ބަގާވާތެއް." ރާއީ ވިދާޅުވިއެވެ.
ރާއީ ވަނީ އެ ޖަލްސާގައި ރާއްޖޭގެ އެއްވެސް ރައްޔިތަކު ބައިވެރި ނުވުމަށް އެދިވަޑައިގެންފައެވެ. މީގެކުރިންވެސް ހިންގާފައިވާ މިފަދަ ކަންކަމުން ރާއްޖެއަށް ކުރިމަތިވި އުނދަގޫ ފެނިގެންގޮސްފައިވާ ކަމަށާއި، އެހެންކަމުން އެއްވެސް ރައްޔިތަކު އަމިއްލައަށް ކުށެއްގެ ތެރެއަށް ނުދިއުމަށް އެދޭކަމަށް ރާއީ ވިދާޅުވިއެވެ.
ބާނަ ބާނާ ތިއްބާ ތިޔަ ވިއްކާލީ ކަނޑު، މިނަމުގައި ކަނޑުވިއްކުމާ ދެކޮޅު އިއްތިހާދުން 2 ޖޫން 2023 ވާ ހުކުރު ދުވަހުގެރޭ 20:30ގައި ކާނިވާ ސަރައްހައްދުގައި ބާއްވާ ޖަލްސާގައި ބައިވެރިވެވަޑައިގެންދެއްވުމަކީ ޤައުމީ ވާޖިބެއް.
🗓️2 ޖޫން 2023
⏳20:30
📍ކާނިވާ ސަރަހައްދު، މާލެ pic.twitter.com/YogIOhIxMy— Kandu Vikkuma Dhekolhu Ihthihadh (@KVDihthihaadh) May 29, 2023
ރައީސްގެ ސިއްރުސިޓީއަކުން ރާއްޖޭގެ ކަނޑުގެ ސަރަހައްދު ވިއްކާލުމުން އެކަމާއި ދެކޮޅުހެދުމަށް އިއްތިހާދުން 2 ޖޫންގައި ކުރިއަށްގެންދާ ހަރަކާތަށް ތައްޔާރުވުމުގެ ގޮތުން މާލޭގައި ބެނާ ހަރުކުރުމުގެ މަސައްކަތްވެސް އަންނަނީ ކުރަމުންނެވެ.
މި އިއްތިހާދުގައި ސަރުކާރަށް ތާއިދުކުރާ ޕާޓީތައް ފިޔަވާ އެހެން ސިޔާސީ ޕާޓީތަކުގެ ފަރާތުން އަންނަނީ ބައިވެރިވަމުންނެވެ. އަދި މިކަމުގައި އުޅުއްވި ވަޒީރުން ޖަވާބުދާރީ ކުރުވުމަށްކަމަށް ބުނެ ބަންޑާރަނައިބު އިބްރާހިމް ރިއްފަތު އަދި ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލަވެސް ރައްޔިތުންގެ މަޖިލީހަށް ހުށަހަޅާފައިވެއެވެ.