މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސީ) ގެ މެރިޓް އެވޯޑް އެކުންފުނީގެ އާންމު އިޖްތިމާޢީ ޒިންމާގެ ތެރެއިން ސްޕޮންސަރ ކޮށްފިއެވެ.
މިކަމަށްޓަކައި އިއްޔެ އެމްއޭސީއެލްގެ ހެޑް އޮފީހުގައި ބޭއްވި ރަސްމިއްޔާތުގައި އެމްއޭސީއެލްގެ ފަރާތުން އެއްބަސްވުމުގައި ސޮއިކުރެއްވީ، ކުންފުނީގެ ސީއީއޯ އަދި އެމްޑީ މަހްޖޫބު ޝުޖާއުއެވެ. ސީއެޗްއެސީގެ ފަރާތުން ސޮއިކުރެއްވީ، އެސްކޫލުގެ ޕްރިންސިޕަލް އާއިޝަތު ސަފޫރާއެވެ. މިއެއްބަސްވުމަކީ، އެމްއޭސީއެލްގެ އިޖުތިމާއީ ޒިންމާގެ ދަށުން ކުރިއަށްގެންދާ ހަރަކާތްތަކުގައި ހިމެނިގެން ތަޢުލީމީ ދާއިރާގެ ކުރިއެރުމަށް ކުރާ މަސައްކަތްތަކުގެ ތެރޭގައި ހިމެނޭ ކަމެއް ކަމަށް އެކުންފުނިން ބުނެއެވެ.
އެގޮތުން އެމްއޭސީއެލްއިން ވަނީ ތިން އަހަރު ދުވަހަށް މެރިޓް އެވޯޑް ސްޕޮންސާރ ކޮށްފައެވެ.
MACL is proud to sign a Memorandum of Understanding with the @CHSE_HighSchool, sponsoring the MACL Merit Award for three consecutive years. This initiative aligns with our mission to contribute to education and innovation in our community. pic.twitter.com/4T7st38pyT
— Maldives Airports Company Ltd – MACL (@MACLmedia) June 13, 2023
މީގެ ދަށުން ސީއެޗްއެސްއީގެ ގްރޭޑް 11 ނިންމާ ދަރިވަރުންގެ ތެރެއިން އެންމެ މަތީ ފާސް ހޯދާ ދަރިވަރުންނަށް ހިތްވަރު ދިނުމާއިއެކު އިތުރު ފުރުސަތުތައް ފަހިކޮށްދެވޭނެއެވެ. "އެމްއޭސީއެލް މެރިޓް އެވޯޑްގެ" ދަށުން ސީއެޗްއެސްސީގެ ގްރޭޑް 11ގައި ކިޔަވަމުންދާ ދަރިވަރުންގެ ތެރެއިން އަންހެން ދެ ދަރިވަރުން އަދި ފިރިހެން ދެ ދަރިވަރަކަށް ކޮންމެ އަހަރަކު މި އެވޯޑް ލިބިގެންދާނެއެވެ. މިއާއެކު މި ދަރިވަރުންނަށް އެމްއޭސީއެލް ހިންގަމުން އަންނަ ވެލާނާ އިންޓަރނޭޝަނަލް އެއަރޕޯޓުގައި އެކުއްޖަކު ޝައުގުވެރިކަން ހުރި ދާއިރާއަކުން މަސައްކަތުގެ ތަޖުރިބާއާއި ތަމްރީނު ހޯދުމުގެ ފުރުސަތު ފަހިވެގެންދާނެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ކުންފުނީގެ ސީއީއޯ އަދި އެމްޑީ މަހްޖޫބު ޝުޖާއު ވިދާޅުވީ، މި އެވޯޑުގެ އަމާޒަކީ ކުދިންގެ ކިޔެވުމުގައި ހޯދާ ކާމިޔާބީ ފާހަގަކުރުމުގެ އިތުރުން މިފަދަ ކާމިޔާބީ ހޯދާ ދަރިވަރުންނަށް ފަހި ފުރުސަތުތައް ހޯދައިދިނުން ކަމަށެވެ. އަދި އެމްއޭސީއެލްގައި އެ ދަރިވަރުންނަށް ވަޒީފާގެ ތަމްރީނާއި ތަޖްރިބާ ފޯރުކޮށްދިނުމަކީ އެމްއޭސީއެލްގެ މުހިންމު މަޤަސަދެއް ކަމަށާއި، އުންމީދުކުރަނީ ކިޔަވާ ނިންމުމަށްފަހު އެމްއޭސީއެލްގެ ވަޒީފާއާއި ގުޅޭ ދަރިވަރުންގެ ނިސްބަތް އިތުރުވެގެން ދިޔުން ކަމަށް އެމް.ޑީ ވިދާޅުވިއެވެ.
MACL MERIT AWARD for CHSE Students for Upcoming Academic year.#Thankyou to the management of @MACLmedia for providing such a beautiful opportunity #inspiring our students to reach #greaterheights @aisthly@MoEdumv #motivationalVibe#Nothingisimpossible#createopportunities pic.twitter.com/5tPmMdirZj
— CHSE (@CHSE_HighSchool) June 13, 2023
އެމްއޭސީއެލްގެ އިޖްތިމާއީ ޒިންމާގެ ދަށުން ހިންގާ މި ޕްރޮގްރާމަކީ، ތައުލީމީ ގޮތުން ކުރިއެރުމަށް ދަރިވަރުންނަށް ހިތްވަރު ދިނުމުގެ އިތުރުން ގައުމަށް ބޭނުންވާ ހިންގުންތެރި އިސްވާރުން އުފެއްދުމަށް އެޅޭ މުހިންމު ފިޔަވަޅެއް ކަމަށް އެކުންފުނިން ބުނެއެވެ.
1979 ވަނަ އަހަރު ވުޖޫދުވެގެން އައި ސީއެޗްއެސްސީއަކީ، ރާއްޖޭގެ އޭ- ލެވެލް ކިޔަވައިދޭ ސްކޫލުތަކުގެ ތެރެއިން، އެންމެ ގިނަ ދަރިވަރުން، ގައުމީ ފެންވަރުގެ ކާމިޔާބު ހޯދަމުން އަންނަ އެއް ސްކޫލެވެ.