މިދިޔަ މޭއި މަހު ރާއްޖޭގެ އެކްސްޕޯޓު 37 އިންސައްތަ ކުރިއަރާފައިވާ ކަމަށް މޯލްޑިވްސް ކަސްޓަމްސް އިން އާމުކޮށްފައިވާ ތަފާސް ހިސާބުތަކުން ދައްކައިފިއެވެ.
ކަސްޓަމްސްއިން ކޮންމެ މަހަކު އާންމު ކުރާ ތަފާސް ހިސާބުތައް ދައްކާގޮތުން މިދިޔަ އަހަރުގެ މޭއި މަހާއި އަޅާ ބަލާއިރު، މިއަހަރު 285 މިލިއަން ރުފިޔާގެ މުދާ ބޭރުކޮށްފައިވެއެވެ. މިއީ 37 އިންސައްތައިގެ ކުރިއެރުމެއް ކަމަށް ކަސްޓަމްސްއިން ބުނެއެވެ.
އެކްސްޕޯޓު އިތުރުވެފައިވާއިރު، އެކްސްޕޯޓުގެ ބޮޑުބައެއް ހިއްސާ ކުރަނީ މަހުގެ ބާވައްތަކެވެ. އަދި އެންމެ ގިނައިން ބޭރު ކޮށްފައިވަނީ ތައިލޭންޑަށެވެ. އެ ޤައުމަށް 175 މިލިއަން ރުފިޔާގެ މުދާ ބޭރުކޮށްފައިވާއިރު، ދެން އެންމެ ގިނައިން ބޭރުކުރީ އިންގިރޭސިވިލާތަށެވެ. އެ ޤައުމަށް 48 މިލިއަން ރުފިޔާގެ މުދާ ބޭރުކޮށްފައިވެއެވެ.
Monthly Statistics – May 2023
👉Imports increased by 5% ⬆️ when compared to the same period of 2022
👉Exports increased by 37% ⬆️ when compared to the same period of 2022.
👉Customs Revenue increased by 19% ⬆️@AbdullaSh4reef @MariyaDidi pic.twitter.com/MXMqQvPNIV
— Maldives Customs Service (@CustomsMv) June 21, 2023
މިއާއެކު ރާއްޖެ އެތެރެކޮށްފައިވާ މިންވަރުވެސް މިމުއްދަތުގައި މިދިޔަ އަހަރާއި އަޅާ ބަލާއިރު ވަނީ އިތުރުވެފައެވެ. އެގޮތުން ތެޔޮ ހިމަނައިގެން ޖުމްލަ 4.6 ބިލިއަން ރުފިޔާގެ މުދާ އެތެރެކޮށްފައިވާ ކަމަށް ކަސްޓަމްސްގެ ތަފާސް ހިސާބުތައް ދައްކައެވެ. މިއީ 5 އިންސައްތައި ކުރިއެރުމެވެ. އަދި ތެޔޮ ނުހިމަނާނަމަ 3.8 ބިލިއަން ރުފިޔާއެކު 13 އިންސައްތައި ކުރިއެރުމެއް ލިބޭ ކަމަށް ކަސްޓަމްސްއިން ބުނެއެވެ.
ރާއްޖެއަށް މުދާ އެންމެ ގިނައިން އެތެރެކުރި ޤައުމުތަކުގެ ތެރޭގައި އިންޑިއާ، ޔޫއޭއީ، ޗައިނާ އަދި އޮމާން ހިމެނެއެވެ. އެންމެ ގިނައިން އެތެރެކޮށްފައިވަނީ އިންޑިއާއިންނެވެ. އެއީ 901 މިލިއަން ރުފިޔާގެ މުދަލެވެ. އިމްޕޯޓުގެ ބޮޑުބައި ހިއްސާ ކުރަނީ، ކާބޯތަކެއްޗާއި، މެޝިނަރީތަކާއި ތެލާއި ގޭހެވެ. އެގޮތުން ތެލާއި ގޭހުން މިދިޔަ މަހުގެ 834 މިލިއަން ރުފިޔާގެ އަގު ކުރެވޭ ވަރަށް އެތެރެ ކުރެވިފައިވާއިރު، ކާބޯތަކެތިން 813 މިލިއަށް ރުފިޔާ އަގު ކުރެވޭވަރަށް ވަނީ އެތެރެކުރެވިފައެވެ.
Monthly Statistics – May 2023
Major Importing categories, Exporting commodities and top 5 importing/exporting countries. @MariyaDidi @AbdullaSh4reef @m_manday pic.twitter.com/BZJFr1l5oJ— Maldives Customs Service (@CustomsMv) June 21, 2023
ރާއްޖޭގެ އިމްޕޯޓް އަދި އެކްސްޕޯޓް އިތުރުވެފައިވާއިރު، ކަސްޓަމްސްއަށް ލިބުނު އާމްދަނީވެސް ވަނީ އިތުރުވެފައެވެ. އެގޮތުން މިދިޔަ އަހަރުގެ މޭއި މަހާއި އަޅާބަލާއިރު މިއަހަރު މިމުއްދަތުގައި ޖުމްލަ 357 މިލިއަން ރުފިޔާ ވަނީ ލިބިފައެވެ. މިއީ 19 އިންސައްތައިގެ ކުރިއެރުމެކެވެ. އަދި ރޯޔަލްޓީގެ ގޮތުގައި 2 މިލިއަން ރުފިޔާ ލިބިފައިވެއެވެ.