އިންތިހާބުތަކުގައި ވާދަ ނުކުރަން ގޮވާލަނީ ނާޖައިޒު ފައިދާ ނެގުމަށް ކަމަށް ވިދާޅުވެ އައްޑޫސިޓީ މޭޔަރު އަލީ ނިޒާރު، ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅަށް ރައްދު ދެއްވައިފިއެވެ.
އަލީ ނިޒާރު ކުރެއްވި ޓްވީޓެއްގައި ވިދާޅުވީ ބޮޑެތި ސިޔާސީ ޕާޓީތަކުން އިންތިހާބުތަކުގައި ވާދަނުކުރަން ގޮވާލަނީ، ނިޒާމު ބަލިކަށިކޮށް ނާޖައިޒު ފައިދާ ނެގުމަށްކަމަށެވެ. އަދި އެގޮތަށް ވާހަކަ ދައްކަނީ ބާރުގައި ތިބެވޭނެ ގޮތެއް ހޯދުމަށް ކަމަށެވެ.
"2018 ގެ ކުރީކޮޅު އެމްޑީޕީ ތެރޭގައި ބާރަށް މި ލަވަ ކިޔާ އުޅުނު. އަދި އެ ރާގަށް ނެށި ބަޔަކުވެސް އުޅުނު." ނިޒާރު ވިދާޅުވިއެވެ.
Bodethi Siyaasee party thakun Inthihaabu thakugai vaadha nukuran govaalanee , nizaam balikashi koh naajaaiz faidhaa negumah. Baarugai dhemi thibeveyne goi hoadhumah. 2018 ge kuree kolhu MDP thereygai baarah mi lava kiyaa ulhunu. Adhi eraagah neshi bayaku ves ulhunu.
— Ali Nizar (@DhekunuNizar) July 6, 2023
ބޮޑަށް ބެލެވޭ ގޮތުގައި ނިޒާރު ރައްދު ދެއްވާފައިމިވަނީ "ދަ ޑިމޮކްރެޓްސް" ރަޖިސްޓްރީ ކުރުމަށް ބޭއްވި ޖަލްސާގައި ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅަށް ރައްދު ދެއްވުމުގެ ގޮތުންނެވެ.
ރޭގެ ޖަލްސާގައި ރައީސް ނަޝީދު ވިދާޅުވީ އެއްވެސް މީހަކު ޖަލުގައި އޮތުމަކީ އެއްވެސް އިރެއްގައި ރުހުނު ކަމެއް ނޫން ކަމަށާއި ޔާމީނަކީ ފަސް އަހަރު ރާއްޖޭގެ ވެރިކަން ކުރެއްވުމުގެ އިތުރުން ދައުލަތުގެ ވަޒީރުކަމާއި އެތައް ހިދުމަތްތަކެއް ކޮށްދެއްވާފައި ހުންނެވި ބޭފުޅެއް ކަމަށެވެ. އަދި އެމަނިކުފާނަށް ފެންނަ ފެނުމުގައި ރިޔާސީ އިންތިހާބުގައި އެ ދެ ބޭފުޅުންވެސް ކުރިމަތިނުލާ، އެކުގައި ބާރަށް މަސައްކަތްކޮށްގެން ރާއްޖޭގެ ރައްޔިތުން އެދޭ ގޮތް ހޯދައިދޭންވީ ކަމަށެވެ.