މިހާރު ވަރަށް ޑިމާންޑް ބޮޑު ބަތަލާއެއްގެ ގޮތުގައި ފާހަގަކޮށްލެވޭ އިންޑިއާގެ ޒުވާން ބަތަލާ މުރްނާލް ތާކޫރް ފިލްމު ކުޅޭ އަގުބޮޑުކޮށްފި ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނި ގޮތުގައި މިހާތަނަށް ފިލްމަކުން 85 ލައްކަ ރުފީސްގެ ފީއެއް ނަގަމުން އައި 30 އަހަރުގެ ބަތަލާ މިހާރު ވަނީ ފިލްމު ކުޅޭ އަގު 135 ޕަސެންޓަށް ބޮޑުކޮށްފަ އެވެ. އެގޮތުން މިހާރު ދެ ކްރޯޑް ރުޕީސް އަށް ވުރެ ކުޑަ އަގަކަށް ފިލްމަކަށް އޭނަ އެއްބަސްނުވާން ނިންމާފައިވާ ކަމަށް މީޑިއާތަކުން ބުންޏެވެ.
އަގަށް މި ގެނައި ބަދަލާ އެކީ ބޮލީވުޑްގެ އިތުރުން އިންޑިއާގެ ދެކުނުގެ ބޮޑެތި ފިލްމަކުން ވެސް ފުރުސަތު ލިބެމުން އަންނަ ބަތަލާ އެންމެ ފަހުން ސޮއިކުރި ތެލެގޫ ފިލްމަށް އެއްވަސްވީ 3.5 ކްރޯޑް ރުޕީސް ކަމަށް މީޑިއާތަކުން ބުންޏެވެ. ނަން އަދި އިއުލާން ނުކުރާ އެކަމަކު މިހާރު ޝޫޓިން ކުރިއަށްދާ ފިލްމުގެ ބަތަލަކީ މިދިޔަ އަހަރު "ލައިގާ" އިން ބޮލީވުޑަށް ތައާރަފުކުރި މަޝްހޫރު ތެލެގޫ އެކްޓަރު ވިޖޭ ދެވަރަކޮންޑާ އެވެ.
މިދިޔަ އަހަރު ތެލެގޫ އެކްޓަރު ދަލްގޫރް ސަލްމާނާ އެކީ މުރްނާލް ފެނިގެން ދިޔަ އަސަރު ގަދަ ލޯބީގެ ފިލްމު "ސީތާ ރަމަމް" ގެ ބޮޑު ކާމިޔާބީއާ ގުޅިގެން ދެކުނުން މުރްނާލްގެ ޑިމާންޑް އުފުލިފައިވެ އެވެ.
ޓީވީ ބަތަލާއެއްގެ ގޮތުގައި އެކްޓިން އަށް ނުކުތް މުރްނާލް އެންމެ ފަހުން ފެނިފައި ވަނީ މިދިޔަ މަހުގެ 29 ގައި ނެޓްފްލިކްސް އިން ޕްރީމިއާކުރި އެންތޮލޮޖީ ފިލްމު "ލަސްޓް ސްޓޯރީސް 2" އިންނެވެ. މި އަހަރު އޭނަ ފެނިގެން ދިޔަ އިތުރު ފިލްމުތަކުގެ ތެރޭގައި "ގުމްރާހް" އާއި "ސެލްފީ" ހިމެނެ އެވެ.
އިންޑިއާގެ އެންމެ މަޝްހޫރު ތަރިންނާ އެކީ ފިލްމުތައް ކުޅެން ލިބެމުން އަންނަ ބަތަލާގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ޕޫޖާ މޭރީ ޖާން،"، "ޕިއްޕާ" އަދި "އާކް މިޗޯލީ" ހިމެނެ އެވެ.
މުރްނާލް ވަނީ ރިތިކް ރޯޝަނާ އެކީ "ސުޕަ 30" ގައި، ފަރުހާން އަޚްތަރާ އެކީ "ތޫފާން" ގައި، ޖޯން އަބްރަހަމާ އެކީ "ބަތުލާ ހައުސް" ގައި، ކާތިކް އާރިއަނާ އެކީ "ދަމާކާ" ގައި އަދި ޝާހިދު ކަޕޫރާ އެކީ "ޖާޒީ" ގައި މަސައްކަތްކޮށްފަ އެވެ.