ޗައިނާގެ ވަންޕްލަސް އިން ނެރެން ތައްޔާރުވަމުން އަންނަ އެ ކުންފުނީގެ ފުރަތަމަ ފަށްޖެހޭ ފޯނު އަންނަ މަހުގެ 29 ގައި ލޯންޗްކުރާނެ ކަމަށް ރިޕޯޓްތައް ބުނެފި އެވެ.
މި ވާހަކަ ތިލަވެފައި ވަނީ އަންނަ މަހުގެ ތެރޭގައި އެ ދައްކައިލަން ތައްޔާރު ވެސް ވަމުން އަންނަ ކަމަށް މި މަހުގެ ކިރީކޮޅު ބައެއް މީޑިއާތަކުން ރިޕޯޓްކޮށްފައި ވަނިކޮށެވެ. ޓެކް ކުންފުނިތަކުގެ އާ އުފެއްދުންތަކާ ބެހޭ މައުލޫމާތު ތިލަކޮށްދޭ މެކްސް ޖަމްބޯ ބުނި ގޮތުގައި ވަންޕްލަސް އިން "ވަންޕްލަސް އޯޕަން" ގެ ނަން ދީފައިވާ ފޯނު ދައްކައިލަން ބާއްވާ އިވެންޓް އޮންނާނީ އަންނަ މަހުގެ 29 ގައި އެމެރިކާގެ ނިއު ޔޯކްގަ އެވެ.
Yes, I can confirm OnePlus Open will be unveiled on August 29th ✅https://t.co/JDsKCxn2gh
— Max Jambor (@MaxJmb) July 13, 2023
ވަންޕްލަސްގެ ފަށްޖެހޭ ފޯނާ ބެހޭ ވާހަކަތަކެއް މީޑިއާތަކުގައި ދެކެވެމުން ދިޔަ ނަމަވެސް މިކަމާ ބެހޭ ގޮތުން އެ ކުންފުނިން ރަސްމީކޮށް ވަކި އެއްޗެއް ނުބުނެ އެވެ.
މިހާރު ވަރަށް ވާދަވެރި މާކެޓެއްގެ ގޮތުގައި ކުރިއަރާފައިވާ ސްމާޓްފޯނުގެ ވިޔަފާރި ވަންޕްލަސް ނުކުތީ މީގެ 9 އަހަރު ކުރިން 2013 ގަ އެވެ. މިއީ ފޯނު އުފައްދާ ޗައިނާގެ މަޝްހޫރު ކުންފުންޏެއް ކަމަށްވާ އޮޕޯގެ ސަބްސިޑަރީއެކެވެ.