މި އަހަރުގެ ރިޔާސީ އިންތިހާބުކޮށް، ވެރިކަމަށް ވަޑައިގެން އެންމެ ފުރަތަމަ ދުވަހު ވެސް ކުރައްވާނެ ކަމަކީ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަންކުރެއްވުން ކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރާއްޖޭގައި ދެވަނަ އަށް އެންމެ ބޮޑު ޕާޓީ، ޕީޕީއެމްގެ ކޯލިޝަން ޕާޓްނަރުގެ ކެންޑިޑޭޓް ރޭ ވިދާޅުވީ ވެރިކަމުގެ ފުރަތަމަ ދުވަހުގެ އެންމެ މުހިއްމު ކަމަކީ ޔާމީން މިނިވަންކޮށް، ގެއަށް ބަދަލުކުރެއްވުން ކަމަށެވެ. ޔާމީން 11 އަހަރުގެ ޖަލު ހުކުމެއް ތަންފީޒު ކުރައްވާތީ، އެ މަނިކުފާނަށް ވަނީ ޕީޕީއެމްގެ ޓިކެޓްގައި އިންތިހާބުގައި ވާދަކުރެއްވުމުގެ ފުރުސަތު ގެއްލިވަޑައިގެންފަ އެވެ.
މިދިޔަ އަހަރުގެ ޑިސެމްބަރު މަހުގެ ފަހުކޮޅު 11 އަހަރުގެ ޖަލު ހުކުމެއް އައީ ވ. އާރަށުގެ މައްސަލައިފައި ކޮރަޕްޝަނާއި މަނީލޯންޑްރީންގެ ކުށް ސާބިތުވުމާ ގުޅިގެންނެވެ.
ޕީޕީއެމް/ޕީއެންސީގެ އޮފީހުގައި މުއިއްޒުގެ މައި ކެމްޕެއިން ޓީމާ އެކު، ރޭ ބޭއްވި ފުރަތަމަ ބައްދަލުވުމުގައި އޭނަ ވިދާޅުވީ ވެރިކަން ލިބިވަޑައިގަތުމުން ފުރަތަމަ ދުވަހުގެ އެންމެ ހާއްސަ އިސްކަމެއް އޮންނާނީ ޔާމީން ޖަލުން ގެއަށް ބަދަލު ކުރުން ކަމަށެވެ.
ޕްރޮޤުރެސިވް ކޯލިޝަންގެ ރިޔާސީ ކެނޑިޑޭޓް
ޑރ މުހައްމަދު މުއިއްޒު މައި ކެމްޕެއިން ޓީމާއެކުގައި ބޭއްވި ފުރަތަމަ ބައްދަލުވުން!#FreePresidentYameen #DhiveheengeRaajje #muizzusembe2023 pic.twitter.com/cxTWkqPGGB— Ahmed Waheed (@RasAmmaday) August 7, 2023
"[އިންތިހާބުގައި] ދެވަނަ ބުރަކަށް ދަންޏާ ދެވަނަ ބުރުގައި ކާމިޔާބުވެ، ފުރަތަމަ ޕޯޑިއަމް އަށް އަރައި، ފުރަތަމަ އަޅުގަނޑު ދައްކާނެ ވާހަކަ އަކީ ވެސް، މިހާރު ހުރި ރައީސަށް ގޮވާލުން މިހާރުން މިހާރަށް އެމަނިކުފާނު [ޔާމީން] ގެއަށް ގެންނަން،" މުއިއްޒު ވިދާޅުވި އެވެ. "ކޮންމެ ގޮތެއް ވިޔަސް، އަޅުގަނޑުމެން ވެރިކަމާ ހަވާލުވާ ފުރަތަމަ ދުވަހު ވެސް، އެހާ ތަނަށް ވެސް އެ މަނިކުފާނު ގެއަށް ނުގެނެސް ބަހައްޓައިފި ނަމަ އަޅުގަނޑު ފުރަތަމަ [ޔާމީން ގެއަށް] ގެންނާނަން. މާނަ އަކީ އަޅުގަނޑުމެން އިއްޔެ ފެށި މަސައްކަތުގެ ގިއަރު އިތުރަށް މަތި ކުރަމުން ގޮސް، އިރާދަކުރެއްވިއްޔާ މިކަން ކާމިޔާބުކޮށް އެ މަނިކުފާނު މިނިވަން ކުރާނަން."
މާލޭގެ މޭޔަރުގެ މަގާމުގައި މިހާރު ހުންނެވި މުއިއްޒު ރިޔާސީ އިންތިހާބަށް ވާދަކުރައްވާ އިރު، ޕީޕީއެމްގެ ތެރޭގައި މުއިއްޒާ މެދު ވަރަށް ނުކިއްސަރު ވިސްނުން ގެންގުޅޭ މީހުން ގިނަކަން ފާހަގަކުރެވެ އެވެ.
މި އަހަރުގެ ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.