ފިލްމީ ކެރިއަރު މުޅިން އާ މިސްރާބަކަށް ގެނެސްދިން ފިލްމަކީ "ކްއީން" ކަމަށް ބަތަލާ ކަންގަނާ ރަނާވަތު ބުނެފި އެވެ.
މިއަދު ސިނަމާތަކަށް ގެނައި އޭނަގެ އާ ފިލްމު "ތޭޖާސް" ގެ ޕްރޮމޯޝަންގެ ތެރެއިން އައިއެމްޑީބީ އިންޑިއާ އަށް ދިން އިންޓަވިއުއެއްގައި ކަންގަނާ ބުނީ 2014 ގެ "ކްއީން" އަކީ އޭނަ އަށް މިހާރު އާދަވިފައި ހުރި ހިސާބަށް އާދެވުމަށް މަގުކޮށައި ދިން ފިލްމު ކަމަށެވެ.
"މާ ބޮޑު ސަމާލުކަމެއް ނުލިބުނު ކުދިކުދި ރޯލުތައް ކުޅެމުން ދަނިކޮށް، ބޮޑު ރޯލެއް ކުޅެން ލިބުނު ފިލްމެއް އެއީ،" ކަންގަނާ ބުންޏެވެ. "އެހެންވެ އަހަރެން ބުނާނީ ކްއީންއޭ އަހަރެންގެ ކެރިއަރުގެ ބަދަލުކޮށްލި ފިލްމަކީ."
With Tejas ready to take off, here's @KanganaTeam recounting her best performance, her favourite movies, and all that's in store for her next, exclusively in this episode of IMDb's Burning Questions 🔥🔥 pic.twitter.com/lPZbRaQui5
— IMDb India (@IMDb_in) October 26, 2023
ޑައިރެކްޓަރު ވިކާސް ބާލްގެ އެ ފިލްމަކީ ކަންގަނާ އަށް މޮޅު ބަތަލާގެ ނެޝަނަލް އެވޯޑް ލިބުނު ފުރަތަމަ ފިލްމު ވެސް މެ އެވެ.
މިހާރުގެ ކާމިޔާބުގެ ސިއްރު "ކްއީން" އާ ކަންގަނާ ގުޅުވި އިރު، އޭގެ ސީކްއެލްއެއް ހަދަން ޝައުގުވެރިވާ ކަމަށް މިދިޔަ ހަފުތާގައި ދިން އިންޓަވިއުއެއްގައި ވިކާސް ބުނެފައިވެ އެވެ. އެކަމަކު އެ ފިލްމު ހަދަން ބޭނުން ވަނީ ކަންގަނާ ފިލްމު ކުޅެން އެއްބަސްވާ ނަމަ އެކަނި ކަމަށް ބުންޏެވެ.
ކަންގަނާ ބުނި ގޮތުގައި އޭނަގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ތަނޫ ވެޑްސް މަނޫ" ގެ ތިން ވަނަ ބައި ވެސް ހިމެ އެވެ. ދެހާސް ފަނަރައިގެ "ތަނޫ ވެޑްސް މަނޫ ރިޓާންސް" އަކީ ކަންގަނާ އަށް މޮޅު ބަތަލާގެ ދެވަނަ ނެޝަނަލް އެވޯޑް ލިބުމެވެ. އެ ފިލްމަކީ ޑައިރެކްޓަރު އާނަންދު އެލް ރާއީގެ އެއްޗެކެވެ.
"ތަނޫ ވެޑްސް މަނޫ 3" ގެ އިތުރުން ތަމަޅަ އެކްޓަރު ވިޖޭ ސެތުޕަތީއާ އެކީ ކުޅޭ ތުރިލާއަކާ ކުރީގެ ތިއޭޓަ ލެޖެންޓް ނޯތީ ބިނޯދިނީގެ ބައޮޕިކް ވެސް ކުރިއަށް އެބަ އޮތް ކަމަށް ކަންގަނާ ބުންޏެވެ.
"ތޭޖާސް" އަށް ފަހު ހުނަރުވެރި ބަތަލާ ފެންނާނި އޭނަ ޑައިރެކްޓް ވެސް ކުރި "އިމަޖެންސީ" އިންނެވެ. އެ ފިލްމު އަންނަ މަހު ރިލީޒްކުރަން އޮއްވައި މިހާރު ވަނީ އަންނަ އަހަރަށް ފަސްކޮށްފަ އެވެ.