އިޒްރޭލުން ދެމުންދާ ހަމަލާތަކާ ގުޅިގެން ފަލަސްތީނުގެ ގާޒާ އިން އިންޓަނެޓާއި ފޯނުގެ ހިދުމަތް ކެނޑިއްޖެ އެވެ.
ގާޒާގައި މިވަގުތު ތިބި ބޭރުގެ މީޑިއާތަކުން ރިޕޯޓުކުރާ ގޮތުގައި ފާއިތުވި ދެ ގަޑިއިރުތެރޭ ގާޒާގެ އެކި ހިސާބުތަކަށް ހަމަލާތައް ދިނުން އިޒްރޭލުން ވަރުގަދަކޮށްފައިވާ ކަމަށާއި އޭގެ ސަބަބުން އިންޓަނެޓާއި ފޯނުގެ ހިދުމަތް އެއްކޮށް މިހާރު ކެނޑިފައިވާ ކަމަށެވެ. އަދި ގާޒާގައި މިހާރު ހިނގަމުންދާ ކަންކަން ބޭރު ދުނިޔެ އަށް ހާމަކޮށްދިނުމުގައި ވެސް ދަތިތަކެއް ކުރިމަތިވެފައިވާ ކަމަށްވެސް ބުނެފައިވެ އެވެ.
އިޒްރޭލުގެ އަސްކަރިއްޔާ އިން ވަނީ ގާޒާގައި ހިންގަމުންދާ އޮޕަރޭޝަން މިރޭ އިތުރަށް ވަރުގަދަކުރާނެ ކަމަށް ބުނެފަ އެވެ. އަދި ހުރިހާ ރައްޔިތުން ވެސް ގާޒާގެ ދެކުނު ސަރަހައްދަށް ދިޔުމަށް ވެސް އަންގާފައިވާއިރު އިޒްރޭލުގެ ހަމަލާތައް ގާޒާގެ ދެކުނުގެ ހިސާބުތަކަށް ވެސް އަންނަނީ އަމާޒުކުރަމުންނެވެ.
🚨🔴 PRCS: We have completely lost contact with the operations room in #Gaza Strip and all our teams operating there due to the Israeli authorities cutting off all landline, cellular and internet communications. We are deeply concerned about the ability of our teams to continue…
— PRCS (@PalestineRCS) October 27, 2023
މި މަހުގެ ހަތްވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ފަލަސްތީނުން މިހާތަނަށް ވަނީ 7،000 އަށް ވުރެ ގިނަ މީހުން ޝަހީދުވެފަ އެވެ. މީގެތެރޭގައި 3،000 އަށް ވުރެ ގިނަ ކުޑަކުދިން ހިމެނޭއިރު އިމާރާތްތަކުގެ ދަށުގައި ތާށިވެފައި 940 ކުއްޖަކު އެބަތިބި ކަމަށް ފަލަސްތީނުގެ ހެލްތު މިނިސްޓްރީން ބުނެ އެވެ.
ހަމަލާތަކުގެ ސަބަބުން 1،650 މީހަކު ގެއްލިފައިވާއިރު އިޒްރޭލުން ގަސްދުގައި ސިއްހީ ފަރުވާދޭ ތަންތަނަށް ހަމަލާތައް ދެމުންދާ ކަމަށްވެސް މިނިސްޓްރީން ބުނެ އެވެ. އެގޮތުން އިޒްރޭލުން މިހާތަނަށް ސިއްހީ ހިދުމަތްދޭ 57 ތަނަކަށް ހަމަލާދީފައިވާ ކަމަށާއި އޭގެ ސަބަބުން 12 ހޮސްޕިޓަލެއްގެ ހިދުމަތް އެއްކޮށް ހުއްޓިފައިވާ ކަމަށް މިނިސްޓްރީން ބުނެ އެވެ.
އިޒްރޭލާއި ހަމާސް ޖަމާއަތުން ކުރަމުންދާ ހަނގުރާމަ ހުއްޓާލަން ދުނިޔޭގެ ގިނަ ގައުމުތަކަކުން ގޮވާލަމުންދާއިރު އިޒްރޭލުން ގާޒާ އަށް ދެމުންދާ ހަމަލާތައް ފާއިތުވި ދުވަސްތަކުގައި ވަނީ އިތުރަށް ވަރުގަދަކޮށްފަ އެވެ.