މާލެސިޓީ ކައުންސިލްގެ ބައި-އިލެކްޝަންގެ ވޯޓުލުމަށް ވޯޓު ފޮށިތަކެއް ބަހައްޓާފައިވާ ސޯޝަލް ސެންޓަރުގައި އިންތިހާބުގެ ކެމްޕޭނަށް ކޯލް ސެންޓަރެއް ހިންގާ ކަމަށްބުނެ އިލެކްޝަންސް ކޮމިޝަނަށް ޝަކުވާ ހުށަހަޅައިފިއެވެ.
އީސީގެ ނައިބުރައީސް އިސްމާއިލް ހަބީބް "އައްޑޫލައިވް"އަށް މައުލޫމާތު ދެއްވަމުން ވިދާޅުވީ، އެފަދަ ޝަކުވާއެއް އެ ކޮމިޝަނަށް ލިބިފައިވާ ކަމަށެވެ.
ހަބީބް ވިދާޅުވީ ޝަކުވާ ލިބުމާ ގުޅިގެން އެތަނަށް ގޮސް ބަލާފައިވާކަމަށާއި، އެހެންނަމަވެސް އެތަނުގައި ހުރި ޔޫތް މިނިސްޓްރީގެ އޮފީހެއްގައި ހިނގަމުން ދިޔައީ އެ އޮފީހުގެ އިދާރީ މަސައްކަތްތަކެއް ކަމަށް އީސީއަށް ޔޫތް މިނިސްޓްރީން މައުލޫމާތު ދީފައިވާ ކަމަށެވެ.
ސޯޝަލްމީޑިއާގައި ދައުރުވަމުންދިޔަ ޕޯސްޓްތަކުގައި ތުހުމަތު ކޮށްފައިވާގޮތުން، އެ އޮފީހުގައި ދިޔައީ ޕީއެންސީގެ ކެންޑިޑޭޓް އާޒިމާ ޝުކޫރަށް ކެމްޕޭން ކުރުމަށް ކޯލް ސެންޓަރެއް ހިންގަމުންނެވެ.
ސޯޝަލް ސެންޓަރުގަ ވޯޓުލަމުން ދާއިރު ހަމަ ސޯޝަލް ސެންޓަރުގެ @MoYEIAmv ގެ އޮފީސް އިމާރާތުގަ އާޒިމާ އަށް ތާއީދު ހޯދުމަށް މިވަގުތުވެސް މިދަނީ ކެމްޕޭން ކުރަމުން.
ސަރުކާރު މުދަލާއި ވަސީލަތް ބޭނުންކޮއްގެން މިކަން ކުރުން މީ ބަލައިގަނެވޭނެ ކަމެއް ނޫން!! @AdhadhuMV @MvCrisis… pic.twitter.com/hTjiBTar4w
— Hussain Shafiu #Ibu2023 (@charly_thuthu) January 13, 2024
މާލެއަށް މޭޔަރަކު ހޮވުމާއި ހުސްވެފައިވާ ތިން ގޮނޑިއަށް މެމްބަރުން ހޮވުމަށް ބާއްވާ ބައި-އިލެކްޝަންގެ ވޯޓުލުން ފަށާފައިވަނީ މިއަދު ހެނދުނު 08:00 ގައެވެ. އިންތިހާބުގެ ވޯޓުލުން ހަވީރު 05:00 އާ ހަމައަށް ކުރިއަށްދާނެއެވެ.
މާލޭ މޭޔަރުކަމަށް ވާދަކުރައްވަނީ ޕީއެންސީގެ ޓިކެޓްގައި އައިޝަތު އާޒިމާ ޝުކޫރު، އެމްޑީޕީގެ ޓިކެޓްގައި އާދަމް އާޒިމް، ޑިމޮކްރެޓްސްގެ ޓިކެޓްގައި ސައިފު ފާތިހު، އަމިއްލަ ގޮތުން ހުސައިން ވަހީދުގެ އިތުރުން އަލީ ޝުއައިބްއެވެ. މި އިންތިހާބުގައި ވޯޓުދިނުމުގެ ހައްްޤު ލިބިފައިވަނީ ޖުމުލަ 56،002 މީހުންނަށެވެ.