ޕްރޮސިކިއުޓަރ ޖެނެރަލް ހުސައިން ޝަމީމަށް ހަމަލާދިން މައްސަލައިގެ ތަހުގީގު ކުރިއަށް ގެންދާގޮތް ބެލުމަށް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހުށަހަޅައިފިއެވެ.
މި މައްސަލަ މަޖިލީހުގެ 241 ކޮމިޓީއަށް ހުށަހަޅާފައިވަނީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.
ހަސަން ލަތީފް މަޖިލީހުގެ ރައީސަށް ފޮނުވި ސިޓީއެއްގައި ވިދާޅުވެފައިވަނީ، ޕީޖީ ޝަމީމަށް ހަމަލާދިން މައްސަލަ މޯލްޑިވްސް ޕޮލިސް ސާވިސްއިން ސީރިއަސް މައްސަލައެއްގެ ގޮތުގައި ފުރިހަމައަށް ތަހުގީގުކޮށް އެކަށީގެންވާ މުއްދަތެއްގެ ތެރޭގައި ތަހުގީގު ނިންމާކަން ކަށަވަރު ކުރުމަށް، މައްސަލަ 241 ކޮމިޓީއަށް ހުށަހަޅުއްވައިދެއްވުން އެދޭކަމަށެވެ.
ޕްރޮސިކިއުޓަރ ޖެނެރަލް އަލްއުސްތާޛް ހުސައިން ޝަމީމަށް މިއަދު ހެނދުނު ދީފައިވާ ނުރައްކާތެރި ހަމަލާގެ ތަޙްޤީޤު @PoliceMv އިން ގެންދާގޮތް ބެލުމަށް @mvpeoplesmajlis ގެ ސަލާމަތީ ޚިދުމަތްތަކާ ކޮމިޓީއަށް ހުށަހަޅައިފީމެވެ. pic.twitter.com/Jct213WQCZ
— Hassan Latheef🎈 (@HassanLatheef) January 31, 2024
ޕީޖީ ޝަމީމަށް ހަމަލާދީފައިވަނީ މިއަދު ހެނދުނު މަގުމަތިންނެވެ. ޝަމީމަށް އޭޑިކޭގައި ފަރުވާދެމުންދާއިރު ފުލުހުން ބުނެފައިވަނީ ޝަމީމަށް ހަމަލާ ދީފައިވަނީ ތޫނު އެއްޗަކުން ނޫން ކަމަށް މިހާތަނަށް ބެލި ބެލުމުން އެނގިފައިވާ ކަމަށެވެ.