އިނގިރޭސި ޕްރިމިއާ ލީގުގައި މިރޭ ޗެލްސީން 6-2 އިން ވުލްވްސް ބަލިކުރިއިރު، ލިވަޕޫލުން 2-0 އިން ބްރެންޓްފޯޑް ބަލިކޮށްފި އެވެ.
ލީގުގައި ކުޅުނު ފުރަތަމަ މެޗުން 2-0 އިން މެންޗެސްޓާ ސިޓީ އަތުން ބަލިވި ޗެލްސީން މިރޭގެ މެޗުގައި ޖެހި ހަ ގޯލުގެ ތެރެއިން ތިން ގޯލު ކާމިޔާބުކޮށް ނޮނީ މަޑުއޭކޭ ވަނީ ހެޓްރިކެއް ހަދައިފަ އެވެ. ޗެލްސީގެ ގޯލުތައް ދެން ކާމިޔާބުކޮށްދިނީ ނިކޮލަސް ޖެކްސަން އާއި ކޯލް ޕާމާގެ އިތުރުން ދާދިފަހުން އެ ކްލަބާއި ގުޅުނު ޕޯޗުގަލްގެ ޕްލޭމޭކަރު، ޖައޯ ފެލިކްސް އެވެ.
ވުލްވްސްގެ ދެ ގޯލު މި މެޗުގައި ކާމިޔާބުކޮށްދިނީ މަތިއުސް ކޫންޔާގެ އިތުރުން ޔޯގަން ސްޓްރަންޑް ލާސަން އެވެ. ވުލްވްސް ވަނީ ލީގުގައި ކުޅުނު ފުރަތަމަ މެޗުގައި އާސެނަލް އަތުން 2-0 އިން ބަލިވެފަ އެވެ.
މިއީ ޗެލްސީގެ އާ ކޯޗު އެންޒޯ މަރެސްކާގެ އިރުޝާދުގެ ދަށުން ކުޅެ ޗެލްސީ މޮޅުވި ދެވަނަ މެޗެވެ. ޗެލްސީން ވަނީ މިދިޔަ ހަފްތާގައި ޔޫއެފާ ކޮންފަރެންސް ލީގުގެ ކޮލިފައިންގެ ފުރަތަމަ ލެގުގައި ސްވިޒަލެންޑްގެ ސާވެޓް އަތުން 2-0 އިން މޮޅުވެފަ އެވެ.
ލިވަޕޫލްގެ އާ ކޯޗު އާން ސްލޮޓްގެ އިރުޝާދުގެ ދަށުން އެޓީމުން އަމިއްލަ ދަނޑުގައި މިރޭ ކުޅުނު ފުރަތަމަ މެޗުގައި ފެނިގެންދިޔަ ފުރަތަމަ ގޯލު މެޗުގެ 13 ވަނަ މިނެޓްގައި ކާމިޔާބުކޮށްދިނީ ލުއިސް ޑިއާޒް އެވެ. މިއީ ކޮލަމްބިއާ އަށް އުފަން ޑިއާޒް ލިވަޕޫލަށް ކުޅެދިން 100 ވަނަ މެޗެވެ.
ދެވަނަ ހާފުގައި ލިވަޕޫލުން ބްރެންޓްފޯޑްގެ ގޯލަށް ނުރައްކާތެރި ހަމަލާތަކެއް ފޮނުވާލިއިރު، މި މެޗުގައި އެޓީމުން ޖެހި ދެވަނަ ގޯލު މެޗުގެ 70 ވަނަ މިނެޓްގައި ކާމިޔާބުކޮށްދިނީ މުހައްމަދު ސަލާ އެވެ. އަދި މެޗުގެ ފަހު ވަގުތުކޮޅުތެރޭ ކޯޑީ ގަކްޕޯ ފޮނުވާލި ހަމަލާއެއް ގޯލުގެ ދަނޑި އަށް ވެސް އަމާޒުވެފައިވެ އެވެ.