ސްޕެނިޝް ލީގުގައި ރޭ ބާސެލޯނާ އިން 2-1 އިން ރަޔޯ ވަޔެކާނޯގެ މައްޗަށް ކުރި ހޯދައިފި އެވެ.
މިއީ ސްޕެނިޝް ލީގުގައި ބާސާ އިން ކުޅުނު ތިންވަނަ މެޗު ކަމަށްވާއިރު، ތިން މެޗުން ވެސް އެޓީމު ވަނީ މޮޅުވެފަ އެވެ.
ރޭގެ މެޗުގެ 9 ވަނަ މިނެޓްގައި އުނާއި ލޮޕޭޒް ވަޔެކާނޯ އަށް ލީޑު ނަގައިދިން އިރު، މިއީ ބާސާގެ ޕެނަލްޓީއޭރިއާ ތެރެއަށް ހުރަސްކޮށްލި ބޯޅައެއް އެއް ފަހަރުން ގޯލަށް ވައްދާލައިގެން ކާމިޔާބު ކުރި ގޯލެކެވެ.
ވަޔެކާނޯ ލީޑުގައި އޮވެ ފުރަތަމަ ހާފް ނިމުނުއިރު ބާސާގެ ކޯޗު ހަންސީ ފްލިކް ވަނީ ދެވަނަ ހާފު ފެށުނުތަނާ ބަދަލު ކުޅުންތެރިއެއްގެ ގޮތުގައި ދާދިފަހުން ބާސާއާ ގުޅުނު ޑެނީ އޮލްމޯ ކުޅެން އަރުވާފަ އެވެ. އޮލްމޯ ބާސާގެ ކުޅުންތެރިއެއްގެ ގޮތުގައި ރަސްމީކޮށް ރަޖިސްޓާ ކުރެވުނީ ވެސް ވެސް އިއްޔެވެ.
ބާސާ އިން ނަތީޖާ އެއްވަރުކުރީ މެޗުގެ 60 ވަނަ މިނެޓްގައި ކަމަށްވާއިރު، ރަފީނިއާ ދިން ޕާހަކުން މި ގޯލު އެޓީމަށް ކާމިޔާބުކޮށްދިނީ ޕެޑްރީ އެވެ. އަދި މެޗުގެ 82 ވަނަ މިނެޓްގައި ބާސާ މޮޅުވި ގޯލު ކާމިޔާބުކޮށްދިނީ އޮލްމޯ ކަމަށްވާއިރު، މިއީ ވަޔެކާނޯގެ އޭރިއާގެ ތެރޭ ހުރެ ފޮނުވާލި ހަމަލާއަކުން ކާމިޔާބުކުރި ގޯލެކެވެ.
އޮލްމޯ އަކީ ބާސާގެ ޔޫތް ޓީމަށް ވެސް ކުޅުނު ކުޅުންތެރިއެއް ކަމަށްވާއިރު، އުމުރުން 16 އަހަރުގައި އޮލްމޯ ވަނީ ބާސާ ދޫކޮށް ޑައިނަމޯ ޒަގްރެބަށް ބަދަލުވެފަ އެވެ. އޮލްމޯ ބާސާ އަށް ބަދަލުވީ ރެޑްބުލް ލީޕްޒިގުން 51 މިލިއަން ޕައުންޑްގެ އަގެއްގަ އެވެ.
ލީގުގައި ބާސާ ދެން ބައްދަލުކުރާނީ ރެއާލް ވަޔަޑޮލިޑްއާ އެވެ.