ފަސް އަހަރުތެރޭ ސްޓެލްކޯ އިން 500،000 ގަސް އިންދުމަށް ނިންމާ ކުރަމުންދާ މަސައްކަތުގެ ތެރެއިން މިހާތަނަށް 30،000 އަށްވުރެއް ގިނަ ގަސް އިންދައިފިއެވެ.
ރައީސް ޑރ. މުހައްމަދު މުއިއްޒު ފައްޓަވައިދެއްވާފައިވާ '5 އަހަރުން 5 މިލިއަން ގަސް' ޕްރޮގްރާމުގައި ބައިވެރިވުމުގެ ގޮތުން ސްޓެލްކޯއިން އަންނަނީ 5 އަހަރުތެރޭގައި 5 ލައްކަ ގަސް އިންދުމުގެ ހަރަކާތެއް ކުރިއަށް ގެންދަމުންނެވެ.
އެގޮތުން އެ މަސައްކަތުގެ ދަށުން ސްޓެލްކޯއިން ވަނީ ޖޫން 5 ވަނަ ދުވަހު ކ. ތުލުސްދޫ އަދި ސްޓެލްކޯއިން ހިދުމަތްދޭ އެހެން ރަށްރަށުގައި ޖުމުލަ 21،007 ގަސް އިނދާފައެވެ. ޖޫން 12 ވަނަ ދުވަހު ކ. ދިއްފުށީ އާ އިންޖީނުގޭގެ މަސައްކަތް ކޮށްޓްރެކްޓަރާއި ހަވާލު ކުރުމަށާއި އާ އިންޖީނުގޭގެ ބިންގާ އެޅުމަށް ބޭއްވި ރަސްމިއްޔާތުގެ ހަވާސާގައި އެ ރަށުގައި 1000 ގަސް އިންދާފައިވާ ކަމަށް ވެސް ސްޓެލްކޯއިން މައުލޫމާތުދެއެވެ. މީގެއިތުރުން ސްޓެލްކޯއިން ހިދުމަތްދޭ އެކި ރަށްރަށުގައި ކުރިއަށްދެއްދިޔަ ގަސް އިންދުމުގެ ހަރަކާތުގެ ތެރެއިން ޖުމުލަ 8364 ގަސް އިންދާފައިވާ ކަމަށްވެސް މައުލޫމާތު ދީފައިވެއެވެ.
ސްޓެލްކޯއިން ބުނެފައިވަނީ މިހާތަނަށް އެ ކުންފުނިން 30،371 ގަސް އިންދާފައިވާކަމަށެވެ.
ފަސް ލައްކަ ގަސް އިންދުމަށް ކުރިއަށް އޮތް ތަނުގައި ކޮންމެ މަހަކުވެސް ސްޓެލްކޯއިން ހިދުމަތްދޭ ރަށްރަށުގައި ގަސް އިންދުމުގެ ހަރަކާތް ކުރިއަށް ގެންދާނެ ކަމަށް އެކުންފުނިން މައުލޫމާތު ދިފައިވެއެވެ.
މި ވެރިކަމުގެ ފަސް އަހަރުގެ ތެރޭގައި ފަސް މިލިއަން ގަސް އިންދެވުމުގެ ޕްރޮގްރާމެއް ހިންގަވާނެކަން ރައީސް އިއުލާންކުރެއްވީ މިދިޔަ އަހަރުގެ ޑިސެމްބަރުގައި ޔޫއޭއީގައި އޮތް "ކޮޕް28" ގަ އެވެ. ފަސް މިލިއަން ގަސް އިންދުމުގެ ޕްރޮގްރާމް މާލޭގެ އިތުރުން މުޅި ރާއްޖޭގައި ކުރިއަށް ގެންދާނެ އެވެ.