ނަޕޯލީ އަށް ކުޅެމުން އައި ނައިޖީރިއާގެ ފޯވާޑް ވިކްޓަ އޮސިމެން ލޯނެއްގެ ދަށުން ތުރުކީގެ ގަލަތަސަރާއީ އަށް ބަދަލުވެއްޖެ އެވެ.
ނަޕޯލީގެ ކޯޗުކަމާ އެންޓޯނިއޯ ކޮންޓޭ ހަވާލުވުމަށްފަހު އޮސިމެން ޓީމުން ބާކީކޮށްފައިވާއިރު، އޭނާ ގެންނަން ނިމިގެންދިޔަ ޓްރާންސްފާ މާކެޓުގައި ޗެލްސީ އާއި ސައުދީ ލީގުގެ އަލް އަހްލީން މަސައްކަތް ކުރި ނަމަވެސް އެކަން ކާމިޔާބުވެފައެއް ނުވެ އެވެ.
ތުރުކީ ލީގުގެ ޓްރާންސްފާ މާކެޓް އަދިވެސް ހުޅުވިފައި އޮތްއިރު، ގަލަތަސަރާއީ އަށް ބަދަލުވާން އޮސިމެން އިއްޔެ ވަނީ ތުރުކީ އަށް ގޮސްފަ އެވެ. އޮސިމެން ގަލަތަސަރާއީ އަށް ބަދަލުވަނީ އަންނަ އަހަރުގެ ޖޫންގެ ނިޔަލަށް ކަމަށްވާއިރު، ލޯނު އެއްބަސްވުން ނިމުމުން 75 މިލިއަން ޔޫރޯ އަށް އޭނާ ގަތުމުގެ ފުރުސަތު ކްލަބްތަކަށް އޮންނާނެ ކަމަށް ރިޕޯޓުތައް ބުނެ އެވެ.
އޮސިމެން ،25، ވަނީ ނަޕޯލީ އަށް ކުޅެދިން 133 މެޗުގައި 76 ގޯލު ކާމިޔާބުކޮށް، އެޓީމަށް 03-2022 ވަނަ ސީޒަނުގައި އިޓަލީ ލީގު ހޯދައިދިނުމުގައި މުހިއްމު ދައުރެއް އަދާކޮށްފަ އެވެ. ނަމަވެސް މިދިޔަ ސީޒަނުގައި އޮސިމެން އަށް އެންމެ މޮޅު ކުޅުން ދެއްކޭ ގޮތް ވެފައި ނުވާއިރު، ނަޕޯލީން ވަނީ މިދިޔަ ޓްރާންސްފާ މާކެޓުގައި ޗެލްސީގެ ބެލްޖިއަމް ފޯވާޑް ރޮމެލޫ ލުކާކޫ އެޓީމަށް ގެންގޮސްފަ އެވެ.