އުރުގުއޭގެ ފޯވާޑް ލުއިސް ސުއަރޭޒް، ގައުމީ ޓީމަށް ކުޅުން ހުއްޓާލަން ނިންމައިފި އެވެ.
ސުއަރޭޒް ،37، ބުނީ މިއީ ގައުމީ ޓީމަށް ކުޅުން ހުއްޓާލާނީ ވޯލްޑް ކަޕްގެ ކޮލިފައިންގައި ހުކުރު ދުވަހުގެރޭ ޕެރަގުއޭއާ ދެކޮޅަށް ކުޅޭ މެޗަށްފަހު ކަމަށެވެ. މިއީ ގައުމީ ޓީޟަށް ހުއްޓާލަން އެންމެ ރަނގަޅު ވަގުތު ކަމަށް ގަބޫލުކުރާ ކަމަށާއި ނަމަވެސް މިއީ ނިންމަން ފަސޭހަ ނިންމުމެއް ނޫން ކަމަށް ސުއަރޭޒް ބުންޏެވެ. ނަމަވެސް ގައުމީ ޓީމަށް ކުޅުން ހުއްޓާލަނީ ޓީމަށްޓަކާ ހުރިހާ އެއްޗެއް ދެވުނު ކަމުގެ ހިތްހަމަޖެހުމާއެކީ ކަމަށްވެސް ސުއަރޭޒް ބުންޏެވެ.
ސުއަރޭޒް އުރުގުއޭގެ ގައުމީ ޓީމަށް ކުޅެން ފެށީ 2007 ގައި ކަމަށްވާއިރު، އޭނާ އަކީ އުރުގުއޭ ޓީމަށް އެންމެ ގިނަ ގޯލު ކާމިޔާބުކޮށްދިން ކުޅުންތެރިޔާ އެވެ. އެގޮތުން ސުއަރޭޒް ވަނީ އުރުގުއޭ ޓީމަށް ކުޅެދިން 142 މެޗުގައި 69 ގޯލު ކާމިޔާބުކޮށްދީފަ އެވެ.
ލިވަޕޫލް އާއި ބާސެލޯނާ އަދި މިހާރު އެމެރިކާގެ އިންޓަ މަޔާމީ އަށް ކުޅެމުން އަންނަ ސުއަރޭޒް ވަނީ އުރުގުއޭ ޓީމާއެކު 2011 ވަނަ އަހަރު ކޮޕަ އެމެރިކާ ފުޓްބޯޅަ މުބާރާތް ކާމިޔާބުކޮށްފަ އެވެ. އޭނާ ވަނީ އުރުގުއޭއާއެކު ހަތަރު ވޯލްޑް ކަޕެއްގައި ވެސް ކުޅެފަ އެވެ.