ރޭސިން ޓްރެކެއް އަޅަން ތިލަފުށިން ބިމެއް ހަމަޖައްސަން ހައުސިން މިނިސްޓްރީގައި އެދިފައިވާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރާފިއު ވިދާޅުވީ ރޭސިން ޓްރެކް އެޅުމަށް ބޭނުންވާ ބިން ތިލަފުށިން ހޯދުމަށް ހަައުސިން މިނިސްޓްރީއަށް ސިޓީއަކުން އެދިފައިވާނެ ކަމަށާއި އަދި ޑްރިފްޓިން އެރީނާއެއް ގާއިމުކުރުމަށް ވެސް ބިމެއް ހަމަޖައްސަން އެދިފައިވާނެ ކަމަށެވެ.
ރޭސިން ޓްރެކާއި ޑްރިފްޓިން އެރީނާާއަށް ބޭނުންވާ ބިން ހަމަޖެހުނުހާ އަވަހަކަށް އެ ދެ ތަން ގާއިމުކުރުމުގެ މަސައްކަތް ފަށާނެ ކަމަށްވެސް ރާފިއު ވިދާޅުވި އެވެ.
މިނިސްޓަރު ވިދާޅުވީ މިހާރު ހުޅުމާލޭގައި ރޭސިން އަދި ޑްރިފްޓިން ހަރަަކާތްތައް ބާއްވަމުންދާ ތަނަކީ އެކަމަށް އެންމެ ރައްކާތެރި ތަނެއްތޯ ބެލުމަށް މިނިސްޓްރީގެ ޓީމެއް ހަމަޖައްސާފައިވާ ކަމަށެވެ. އަދި ކޮންމެ ކުޅިވަރަކީ ވެސް އެ ކުޅިވަރު ކުޅޭ މީހުންނާއި އަދި ކުޅިވަރު ބަލަންދާ ފަރާތްތަކަށް ވެސް ރައްކާތެރިތަނަކަށް ވާންޖެހޭނެކަން މިނިސްޓަރު ފާހަގަކުރެއްވި އެވެ.
މާލެ ސަރަހައްދުގައި ރޭސިން އަދި ޑްރިފްޓިން ޓްރެކެއް އެޅުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.