ފްރާންސްގެ ތަޖުރިބާކާރު ޑިފެންޑަރު ރަފޭލް ވަރާން ފުޓްބޯޅަ ކުޅުން ހުއްޓާލައިފި އެވެ.
ވަރާން ،31، ބުނީ މިއީ ފުޓްބޯޅަ ކުޅުން ހުއްޓާލަން އެންމެ ރަނގަޅު ވަގުތު ކަމަށް ގަބޫލުކުރާ ކަމަށާއި ކެރިއަރުގައި ހޯދުނު ކާމިޔާބީތަކާ މެދު ވަރަށް ބޮޑަށް ހިތްހަމަޖެހޭ ކަމަށެވެ. އަދި ސަޕޯޓަރުން ފަހުރުވެރިކޮށްދެވުނު ކަމަށް އުއްމީދުކުރާ ކަމަށްވެސް ވަރާން ބުންޏެވެ.
ފްރާންސްގެ ލޯންސް އިން ކެރިއަރު ފެށި ވަރާން 2011 ވަނަ އަހަރު ވަނީ ސްޕެއިންގެ ގަދަ ބާރު، ރެއާލް މެޑްރިޑާއި ގުޅިފަ އެވެ. ރެއާލްގައި ހޭދަކުރި 10 އަހަރުތެރޭ ވަރާން ވަނީ އެ ކްލަބާއެކު 18 ތަށްޓެއް ކާމިޔާބުކޮށްފަ އެވެ. އޭގެތެރޭގައި ހަތަރު ޗެމްޕިއަންސް ލީގާއި ތިން ސްޕެނިޝް ލީގު ތަށި ހިމެނެ އެވެ.
ރެއާލް ދޫކޮށް ވަރާން ވަނީ 2021 ގައި މެންޗެސްޓާ ޔުނައިޓެޑަށް ބަދަލުވެފަ އެވެ. ޔުނައިޓެޑަށް 95 މެޗު ވަރާން ކުޅެދިންއިރު އަނިޔާގެ ގިނަ މައްސަލަތަކަކާއި އޭނާ ކުރިމަތިލާން ޖެހިފައިވެ އެވެ. ޔުނައިޓެޑާއެކު ވަރާން ވަނީ އިނގިރޭސި ލީގު ކަޕް އަދި އެފްއޭ ކަޕެއް ކާމިޔާބުކޮށްފަ އެވެ.
ޔުނައިޓެޑް ދޫކޮށްލުމަށް ފަހު މިދިޔަ ޖުލައި މަހު ވަރާން ބަދަލުވީ އިޓަލީ ލީގުގެ ކޯމޯ އަށެވެ. އެ ކްލަބަށް ކުޅެދިން ފުރަތަމަ މެޗުގައި ވަރާންގެ ކަކުލަށް ވަނީ އަނިޔާވެފަ އެވެ. ވަރާން ވަނީ ކުޅުން ހުއްޓާލުމަށްފަހު ވެސް ކޯމޯގައި މަޑުކުރަން ނިންމާފަ އެވެ.
ފްރާންސްގެ ގައުމީ ޓީމާއެކު ވޯލްޑް ކަޕް އަދި ނޭޝަންސް ލީގު ކާމިޔާބުކޮށްފައިވާ ވަރާން ވަނީ އެޓީމަށް 93 މެޗު ކުޅެދީފަ އެވެ.