މި ސީޒަނުގެ ޔޫރޮޕާ ލީގުގައި ކުޅުނު ފުރަތަމަ މެޗުގައި ރޭ އަމިއްލަ ދަނޑުގައި ނެދަލޭންޑްސްގެ އެފްސީ ޓްވެންޓޭއާ ބައްދަލުކޮށް 1-1 އިން މެންޗެސްޓާ ޔުނައިޓެޑް އެއްވަރުވެއްޖެ އެވެ.
މި މެޗުގައި ފެނިގެންދިޔަ ފުރަތަމަ ގޯލު މެޗުގެ 35 ވަނަ މިނެޓްގައި ޔުނައިޓެޑަށް ކާމިޔާބުކޮށްދިނީ ކްރިސްޓިއަން އެރިކްސަން އެވެ. މިއީ ޓްވެންޓޭގެ އޭރިއާ ތެރޭ ހުރެ ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އެރިކްސަން ކާމިޔާބުކުރި ގޯލެކެވެ.
ދެވަނަ ހާފުގައި ޔުނައިޓެޑްގެ ގޯލަށް ނުރައްކާ ކުރަން ޓްވެންޓޭ އިން މަސައްކަތް ކުރަމުންދިޔައިރު، އެޓީމުން ނަތީޖާ އެއްވަރުކުރީ މެޗުގެ 68 ވަނަ މިނެޓްގަ އެވެ. މިއީ އެރިކްސަން އަތުން ބޯޅަ ހޯދައިގެން ޓްވެންޓޭގެ ސޭމް ލެމާސް ޔުނައިޓެޑްގެ އޭރިއާ ތެރެއަށް ވަދެ ފޮނުވާލި ހަމަލާއަކުން ކާމިޔާބު ކުރި ގޯލެކެވެ.
މި ގޯލާއެކު ޔުނައިޓެޑުން ލީޑު ނަގަން ވަރަށް ބޮޑަށް ކުރިއަށް ޖެހިލައިގެން ކުޅުނުއިރު، ޓްވެންޓޭގެ ގޯލަށް ނުރައްކާތެރި ހަމަލާތަކެއް ވަނީ ފޮނުވާލާފަ އެވެ. އެގޮތުން ޖޯޝުއާ ޒާކްޒީ އާއި ހެރީ މެގުއާ ފޮނުވާލި ހަމަލާ ޓްވެންޓޭގެ ގޯލްކީޕަރު މަތަކުރިއިރު، އޭރިއާގެ ބޭރުން ބްރޫނޯ ފެނާންޑޭސް ފޮނުވާލި ބާރު ހަމަލާ ދިޔައީ ގޯލުގެ ކުޑަތަންކޮޅެއް ބޭރުންނެވެ.
ލީގު އުސޫލުން ކުރިއަށްދާ ޔޫރޮޕާ ލީގުގައި މިފަހަރު 36 ޓީމެއް ވާދަކުރާއިރު، ކޮންމެ ޓީމަކުން ވެސް ޖުމްލަ އަށް މެޗު ކުޅޭނެ އެވެ. އޭގެތެރެއިން ހަތަރު މެޗު ކުޅޭނީ އަމިއްލަ ދަނޑުގައި ކަމަށްވާއިރު އަނެއް ހަތަރު މެޗު ކުޅޭނީ ރަށުން ބޭރުގަ އެވެ. ލީގު ބުރު ނިމޭއިރު އެންމެ ގިނަ ޕޮއިންޓު ހޯދާ ގަދަ އަށް ޓީމު މުބާރާތުގެ ގަދަ 16 އަށް ދަތުރުކުރާނެ އެވެ.
އަދި ނުވަ ވަނައިން ފެށިގެން 24 ވަނަ އާ ދެމެދުގައި ހިމެނޭ ޓީމުތައް ދެވަނަ ބުރަށް ދިޔުމަށް ކުޅޭނީ ޕްލޭއޮފް ބުރެކެވެ. އޭގެެއިން މޮޅުވާ އަށް ޓީމަކަށް ގަދަ 16 އިން ޖާގަ ލިބޭނެ އެވެ.