(ސެޕްޓެމްބަރު 23 ވަނަ ދުވަހުގެ ބަޔާ ގުޅޭ)
ތާބިޢީންގެ ބަސްފުޅުތަކުން ކީރިތި ޤުރުއާން ތަފްސީރުކުރުން:
ތާބިޢީންނަކީ މުސްލިމެއްގެ ގޮތުގައި ހުރެގެން ރަސޫލާ ﷺ އާއި ބައްދަލުވުމުގެ ފުރުސަތު ނުލިބޭ، އެކަލޭގެފާނުގެ ޞަޙާބީއަކާއި ބައްދަލުވެ، މުސްލިމެއްގެ ގޮތުގައި ހުރެ ދުނިޔެ ދޫކޮށްދިޔަ ބޭކަލުންނެވެ. ތާބިޢީ ބޭކަލުންނަކީ ނަބިއްޔާ ﷺ ބަޔާންކުރެއްވި އެންމެ މާތް ތިން ޤަރުނުގެ ތެރޭގައި ހިމެނިވަޑައިގަންނަވާ ބޭކަލުންނެވެ.
ތާބިޢީ ބޭކަލުން ޝަރުޢީ ޢިލްމުތައް ހޯއްދަވާފައިވަނީ ޞަޙާބީންގެ އަރިހުންނެވެ. މިގޮތުން ތަފްސީރު ޢިލްމުވެސް ތާބިޢީންވަނީ ޞަޙާބީންގެ އަރިހުން ހޯއްދަވާފައެވެ. އަދި ތަފްސީރު ޢިލްމުގައި ބައެއް ތާބިޢީ ބޭކަލުންވަނީ ކުރިއަރައި މަޝްހޫރު ވެގެންގޮސްފައެވެ.
ތަފްސީރު ޢިލްމުގައި މަޝްހޫރު ތާބިޢީންގެ ތެރޭގައި އިމާމު މުޖާހިދުގެފާނާއި، ޢަތާއު ބުން އަބީ ރަބާޙްގެފާނާއި، ޢިކްރިމާގެފާނާއި، ސަޢީދު ބުން ޖުބައިރުގެފާނާއި، ތާވޫސްގެފާނާއި، ޒައިދް ބުން އަސްލަމްގެފާނާއި، މުޙައްމަދު ބުން ކަޢުބު އަލްޤުރަޟީގެފާނާއި، ޤަތާދާގެފާނާއި، އަލްޙަސަނުލް ބަސްރީގެފާނުގެ ހިމެނިވަޑައިގަންނަވައެވެ. މިބޭކަލުންނަކީ މާތް ޞަޙާބީ ޢަބްދުﷲ ބުން ޢައްބާސްގެފާނާއި، އުބައްޔު ބުން ކަޢުބުގެފާނާއި، ޢަބްދުﷲ ބުން މަސްޢޫދުގެފާނުގެ ދަރިވަރުންނެވެ.
ކީރިތި ޤުރުއާން ތަފްސީރު ކުރުމުގައި ތާބިޢީންގެ މަސްދަރުތައް:
* ކީރިތި ޤުރުއާން
* ނަބަވީ ޙަދީޘް
* ޞަޙާބީންގެ ބަސްފުޅުތައް
* ޢަރަބި ބަސް
* އަހުލު ކިތާބީންގެ ރިވާޔަތްތައް
* ފަހުމާއި އިޖްތިހާދު
ކީރިތި ޤުރުއާން ތަފްސީރު ކުރުމުގައި ތާބިޢީންގެ މަސްދަރުތަކަކީވެސް ޞަޙާބީންގެ މަސްދަރުތަކެވެ. ތާބިޢީން އިތުރުކޮށްފައިވާ މަސްދަރަކީ ޞަޙާބީންގެ ބަސްފުޅުތަކެވެ.
ކީރިތި ޤުރުއާން ތަފްސީރުކުރުމުގައި ތާބިޢީންގެ ބަސްފުޅުތަކަށް ބަލައިގަތުމުގެ ޙުކުމް:
ތާބިޢީއަކު އަމިއްލަ އިޖްތިހާދުން އެނގުމެއް ނުވާ، ޣައިބުގެ ކަމެއް، ނުވަތަ އަސްބާބު އައްނުޒޫލުފަދަ ކަމެއްގެ ތަފްސީރު ބަޔާންކޮށްފިނަމަ އެޚަބަރެއް ޤަބޫލެއް ނުކުރެވޭނެއެވެ. ސަބަބަކީ އެފަދަ ޚަބަރުތަކަކީ ޞައްޙަ ދަލީލަކަށް ބުރަވެގެންނޫނީ ނުބުވޭނެ ޚަބަރަކަށްވާތީއެވެ.
ތާބިޢީއަކު އަހުލުކިތާބީންގެ ފޮތްތަކާއި، އެބައިމީހުންގެ ޢިލްމުވެރިންގެ ޚަބަރުތަކަށް ބުރަވެ ބަޔާންކުރާ ތަފްސީރަށް އޮތް ޙުކުމަކީ، މިނުކުތާގައި ޞަޙާބީން އަހުލުކިތާބީންގެ ޚަބަރުތަކަށް ރުޖޫޢަވެގެން ކުރާ ތަފްސީރާއި އެއް ޙުކުމެކެވެ.
ތާބިޢީންގެ ބޭކަލުން ތަފްސީރުގައި އިއްތިފާޤުވެއްޖެނަމަ އެބޭކަލުންގެ ބަސްފުޅަކީ ޙުއްޖަތެކެވެ.
ތާބިޢީންގެ ބޭކަލުން ތަފްސީރުގައި ޚިލާފުވެއްޖެނަމަ އެކެއްގެ ބަސް އަނެކެއްގެ ބަހުގެ މައްޗަށް އިސްކުރެވޭނެ ހަމައެއް ނުވެއެވެ. އެޙާލަތުގައި ޖެހޭނީ ތަރްޖީޙުކުރުމުގެ ޤަވާއިދުތަކުން ރައުޔެއް ތަރްޖީޙުކުރާށެވެ.
އެންމެ ތާބިޢީއެއްގެ ފަރާތުން ކީރިތި ޤުރުއާނުގެ ތަފްސީރުގައި ބަސްފުޅެއް ވާރިދުވެ، އެބޭކަލެއްގެ އެބަސްފުޅާއި ޚިލާފުވާ އެއްވެސް ބޭކަލެއް ނެތްނަމަ، އެބަސްފުޅަކީ ޞަޙާބީންގެ ބަސްފުޅަށްވުރެ ދަށް ދަރަޖައެއްގެ ބަސްފުޅެކެވެ. އެހެންނަމަވެސް ތާބިޢީންނަށްވުރެ ފަހުން އައި ބޭކަލުންގެ ބަހަށްވުރެ މަތީ ދަރަޖައެއްގެ ބަސްފުޅެކެވެ. (ނުނިމޭ)
ނޯޓް: މިއީ ޝެއިހް އަހުމަދު ރިމާޒުގެ ލިޔުއްވުމެކެވެ.