މި އަހަރުގެ މޯލްޑިވްސް ސްޕޯޓްސް އެވޯޑްސް ހަފުލާ މި މަހުގެ 17 ވަނަ ދުވަހު ބޭއްވުމަށް ނިންމައިފި އެވެ.
ސްޕޯޓްސް އެވޯޑްސް ހަފުލާ އެންމެ ފުރަތަމަ ބާއްވަން އޮތީ މިދިޔަ ޖޫން މަހުގެ 27 ގަ އެވެ. ފަހުން ހަފުލާ ޖުލައި މަހުގެ ހަތަރަކަށް ފަސްކުރުމަށްފަހު، ހަރަދު ކުޑަކުރުމަށް އެޅި ފިޔަވަޅުތަކުގެ ސަބަބުން މި ހަފްލާ ވަނީ މުއްދަތެއް ނެތް ގޮތަށް ފަސްކޮށްފަ އެވެ.
މޯލްޑިވްސް ސްޕޯޓްސް އެވޯޑްސް އަކީ ރާއްޖޭގެ ގައުމީ ފަންތީގެ ހުރިހާ ކުޅިވަރެއް ހިމެނޭހެން ދެވޭ ހަމައެކަނި އެވޯޑެވެ.
މި އަހަރު ވެސް 18 ކުޅިވަރު އެސޯސިއޭޝަނެއްގެ މޮޅު ކުޅުންތެރިން ހޮވައި އަހަރުގެ އެންމެ މޮޅު އެތުލީޓުވެސް ހޮވާނެ އެވެ. މީގެ އިތުރުން ކުޅިވަރާ ގުޅުން ހުރި ދާއިރާތަކުގެ ފަރާތްތަކަށް އެވޯޑު ދިނުމުގެ އިތުރުން، ކުޅިވަރަށް ކޮށް ދީފައިވާ ޚިދުމަތްތައް ފާހަގަކޮށް، ހިތްވަރު ދިނުމުގެ ގޮތުން އެޕްރިސިއޭޝަން އެވޯޑުތަކެއް ވެސް ދޭން ހަމަޖެހިފައިވެ އެވެ.
މޯލްޑިވްސް ސްޕޯޓްސް އެވޯޑްސް ދޭން ފެށީ 2022 އިން ފެށިގެންނެވެ.