އިޒްރޭލަށް މި ދައްކާލީ އިރާނުގައި ހުރި ބާރުގެ ކުޑަމިންވަރެއް ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.
އިރާނުން ރޭ ވަނީ އިޒްރޭލުގެ މެދުތެރޭގެ ހިސާބުތަކަށް އަމާޒުކޮށް 200 އަށް ވުރެ ގިނަ ވައިގެ ހަމަލާ ފޮނުވާލާފަ އެވެ. މިއީ ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އާއި ލުބްނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލުމުގެ ބަދަލެއްގެ ގޮތުން ދިން ހަމަލާއެއް ކަމަށް އިރާނުން ވަނީ ބުނެފަ އެވެ.
މި ހަމަލާގެ ރައްދު އިރާނަށް ދޭނެ ކަމަށް އިޒްރޭލުން ބުނެފައިވާއިރު، އިރާނުގެ ރައީސް ވިދާޅުވީ އިޒްރޭލަށް ދިން ހަމަލާއަކީ އިރާނުގެ ރައްޔިތުންގެ ދިފާއުގައި ދެވުނު ހަމަލާއެއް ކަމަށާއި އިރާނުން ހަނގުރާމައެއްގެ ތެރެއަށް ވަންނަން ބޭނުން ނުވާ ކަމަށެވެ. ނަމަވެސް އިޒްރޭލުން ދޭ އިންޒާރުތަކާއި ދެކޮޅަށް އިރާނުން ތެދުވާނެ ކަމަށާއި އިޒްރޭލަށް މި ދައްކާލީ އިރާނުގައި ހުރި ބާރުގެ ކުޑަ މިންވަރެއް ކަމަށްވާއިރު، އެގައުމާ ދެކޮޅަށް ހަނގުރާމަ އަށް ނުނިކުތުމަށް އިޒްރޭލަށް ވަނީ ގޮވާލާފަ އެވެ.
އިރާނާއި ގާތް ގުޅުމެއް ބާއްވަމުން އަންނަ ލުބްނާނުގެ ހިޒްބުﷲ ޖަމާއަތުގެ ލީޑަރު ނަސްރުﷲ އާއި އެ ޖަމާއަތުގެ އިސް ލީޑަރުންތަކެއް އަވަހާރަކޮށްލީ މިދިޔަ ހުކުރު ދުވަހު އިޒްރޭލުން ލުބްނާނުގެ ވެރިރަށް ބެއިރޫތަށް ދިން ވައިގެ ހަމަލާތަކެއްގަ އެވެ. އަދި ހަމާސްގެ ވެރިޔާ ހަނިއްޔާ އަވަހާރަކޮށްލީ އިރާނުގައި ހުންނަވަނިކޮށް މިދިޔަ ޖުލައި މަހުގެ ތެރޭގަ އެވެ.
އިރާނުން ވަނީ ހަނިއްޔާ އަދި ނަސްރުﷲ އަވަހާރަކޮށްލުމުގެ ބަދަލު އިޒްރޭލުގެ ކިބައިން ހިފާނެ ކަމަށް މީގެކުރިން އިންޒާރު ދީފަ އެވެ.
އިޒްރޭލުން ފާއިތުވި ދެ ހަފްތާތެރޭ ލުބްނާނުގެ އެކި ސަރަހައްދުތަކަށް ވައިގެ ވަރުގަދަ ހަމަލާތަކެއް ވަނީ ދީފަ އެވެ. އެ ހަމަލާތަކުގައި ލުބްނާނުން މިހާތަނަށް 1،000 އަށް ވުރެ ގިނަ މީހުން މަރުވެފައިވާއިރު، ލުބްނާނުން 100،000 އަށް ވުރެ ގިނަ މީހުން ވަނީ އެގައުމު ދޫކޮށް ސީރިޔާ އަށް ގޮސްފަ އެވެ.
މީގެއިތުރުން އިޒްރޭލުން އަންނަނީ ފަލަސްތީނުގެ ގާޒާގައި ވެސް ބޮޑު ގަތުލްއާންމެއް ހިންގަމުންނެވެ. އެ ގަތުލްއާންމުގައި މިހާތަނަށް ގާޒާ އިން ވަނީ 41،000 އަށް ވުރެ ގިނަ މީހުން މަރުވެފަ އެވެ.