އިނގިރޭސި ޕްރިމިއާ ލީގުގައި މިރޭ ސައުތެމްޓަން 3-2 އިން ބަލިކޮށް ލީގުގެ އެއްވަނައިގައި ލިވަޕޫލުން 8 ޕޮއިންޓްގެ ލީޑެއް ނަގައިފި އެވެ.
މި މޮޅާއެކު ލީގުގެ އެއްވަނައިގައި ލިވަޕޫލް މިހާރު އޮތީ 12 މެޗުން ލިބުނު 31 ޕޮއިންޓާ އެކު އެވެ. ދެވަނައިގައި 23 ޕޮއިންޓާ އެކު މެންޗެސްޓާ ސިޓީ އޮތްއިރު ތިންވަނައިގައި 22 ޕޮއިންޓާ އެކު އޮތީ ޗެލްސީ އެވެ.
ސައުތެމްޓަންގެ ދަނޑުގައި ކުޅުނު މި މެޗުގެ 30 ވަނަ މިނެޓްގައި ޑޮމިނިކް ސޮބޯސްލާއީ ވަނީ ލިވަޕޫލަށް ލީޑު ނަގައިދީފަ އެވެ. މިއީ ސައުތެމްޓަންގެ ފަހަތުން ހެދުނު ގޯހެއްގެ ފައިދާ ނަގައި ކާމިޔާބު ކުރި ގޯލެކެވެ. ނަމަވެސް ފުރަތަމަ ހާފް ނިމުމުގެ ކުރިން އެޑަމް އާމްސްޓްރޯންގް ވަނީ ސައުތެމްޓަނަށް ނަތީޖާ އެއްވަރުކޮށްދީފަ އެވެ.
އަދި ދެވަނަ ހާފުގެ ކުރީކޮޅު ސައުތެމްޓަނުން އުފެއްދި ކައުންޓަ އެޓޭކެއްގައި މެތިއުސް ފެނާންޑޭސް ވަނީ އެޓީމަށް ލީޑު ނަގައިދީފަ އެވެ. ނަމަވެސް މެޗުގެ 65 ވަނަ މިނެޓްގައި މުހައްމަދު ސަލާގެ ގޯލުން ލިވަޕޫލުން ވަނީ ނަތީޖާ އެއްވަރުކޮށްފަ އެވެ. މި މެޗުން ލިވަޕޫލަށް ތިން ޕޮއިންޓު ކަށަވަރުކޮށްދިން ގޯލު މެޗުގެ 83 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ ވެސް ސަލާ އެވެ. މިއީ ސައުތެމްޓަންގެ އޭރިއާ ތެރެއިން އެޓީމު ކުޅުންތެރިއެއްގެ އަތުގައި ބޯޅަ ޖެހުމުން ލިބުނު ޕެނަލްޓީއެކެވެ.
ޕްރިމިއާ ލީގުގައި އަންނަ ހަފްތާގައި ލިވަޕޫލުން އަމިއްލަ ދަނޑުގައި ނިކުންނާނީ ދެވަނައިގައި އޮތް ސިޓީއާ ދެކޮޅަށެވެ.