ރައްޓެހިވެގެން އުޅޭތާ މިހާރު ދެ އަހަރުވެފައިވާ އިންޑިއާގެ ފިލްމީ ތަރިން ކަމަށްވާ ތަމަންނާ ބާޓިއާ އާއި ވިޖޭ ވަރުމާ އަންނަ އަހަރު ކައިވެނި ކުރާނެ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ އެ މީހުން މިހާރު ކައިވެންޏަށް ޕްލޭން ކުރަމުން އަންނަ ކަމަށެވެ. އެކަމަކު ކައިވެނި ކުރާނީ އަންނަ އަހަރުގެ ކިހާ ހިސާބަކު ކަމަށް އަދި ސާފު ނުވާ ކަމަށް މީޑިއާތަކުން ބުންޏެވެ.
ނަމަވެސް ކައިވެންޏަށް ފަހު މުމްބާއީގައި އުޅެން ތަމަންނާ އާއި ވިޖޭ މިހާރު އެޕާޓްމަންޓަކަށް ބަލަމުން އަންނަ ކަމަށް ރިޕޯޓްތައް ބުނެ އެވެ.
އިންޑިއާގެ ދެކުނު ފިލްމުގެ އިންޑަސްޓްރީގެ ވަރަށް ނުފޫޒު ގަދަ ބަތަލާއެއްގެ ގޮތުގައި ފާހަގަކޮށްލެވޭ ތަމަންނާ، 34، އަކީ މަދުމަދުން ބޮލީވުޑްގެ ފިލްމުތައް ވެސް ކުޅޭ ބަތަލާއެކެވެ. މި އަހަރު ވެސް އޭނަ ހިންދީ ދެ ފިލްމަކުން ފެނިފައިވެ އެވެ. އެއީ ޖޯން އަބްރަހަމްގެ "ވޭދާ" އާއި މި އަހަރުގެ އެންމެ ބޮޑު ހިޓް ކަމަށްވާ "އިސްތިރީ 2" އިންނެވެ. އެ ފިލްމުގައި ހިމެނޭ ތަމަންނާގެ ލަވަ "އާޖް ކީ ރާތު" އަކީ އާންމުންގެ ތެރޭގައި ވަރަށް ބޮޑަށް ޓްރެންޑްވި ލަވައެކެވެ.
ފިލްމުތަކުގައި އާންމުކޮށް ވަރުގަދަ ސަޕޯޓިން ރޯލުތަކެއް ކުޅެމުން އަންނަ ވިޖޭ، 38، އަކީ ވަރަށް ހުނަރުވެރި އެކްޓަރެއް ނަމަވެސް އާންމުންގެ ތެރޭގައި މާ މަޝްހޫރު މީހެއް ނޫނެވެ.
އޭނަ އާއި ތަމަންނާ ރައްޓެހިވީ މިދިޔަ އަހަރު ނެޓްފްލިކްސް އިން ގެނެސްދިން އެންތޮލޮޖީ ފިލްމު "ލަސްޓް ސްޓޯރީސް 2" ގެ ޝޫޓިންގެ ތެރެއިން 2022 ގަ އެވެ. އެ ފިލްމުގައި ދެ މީހުން އެކީގައި ފެނިފައި ވަނީ "ސެކްސް ވިތު އެކްސް" ކިޔާ ސެގްމަންޓުންނެވެ.