ޑައިރެކްޓަރު ސަންޖޭ ލީލާ ބަންސާލީ އަކީ "ގޯޑްފާދާ" ކަމަށާއި އޭނައާ އެކީ އަލުން މަސައްކަތް ކުރަން ލިބުމަކީ ވަރަށް ބޮޑު އުފަލެއް ކަމަށްވާ ބޮލީވުޑްގެ ތަރި ރަންބީރް ކަޕޫރް ބުނެފި އެވެ.
މިހާރު ގޯއާގައި ކުރިއަށްދާ 55 ވަނަ އިންޓަނޭޝަނަލް ފިލްމު ފެސްޓިވަލް އޮފް އިންޑިއާ (އައިއެފްއެފްއައި) ގައި ރަންބީރް އިއްޔެ ބުނީ ބަންސާލީގެ އާ ފިލްމު "ލަވް އެންޑް ވޯ" އިން ފުރުސަތު ލިބުމުން ވަރަށް އުފަލުން ހުރި ކަމަށެވެ. އޭނަ ބުނީ ބަންސާލީގެ 2007 ގެ "ސާވަރިއާ" އިން ބޮލީވުޑަށް ނުކުތްތާ 17 އަހަރު ފަހުން އަނެއްކާ ވެސް އެކީގައި މަސައްކަތް ކުރަން ލިބުމަކީ ވަރަށް ހިތްގައިމު ތަޖުރިބާއަކަށް ވާނެ ކަމަށެވެ.
"ފިލްމީ މަސައްކަތުގައި މިހާތަނަށް އެހަންނަށް ދަސްވި ގިނަ ކަންކަން ދަސްވީ ސީދާ ބަންސާލީ ސާގެ ފަރާތުން. އެހެންވީމަ އެއީ އަބަދު ވެސް ވަރަށް ހާއްސަ މީހަކަށް ވާނެ،" ކުރީގެ ތަރި ރިޝީ ކަޕޫރްގެ ދަރިފުޅު ބުންޏެވެ. "އަހަރެން އަބަދު ވެސް ދެކެނީ ބަންސާލީ އަކީ އަހަރެންގެ ގޯޑްފާދާގެ ގޮތުގައި."
ރަންބީރް ބުނީ ވަރަށް ޒަމާންކޮށްފައި އަނެއްކާ ވެސް ބަންސާލީގެ ފިލްމެއްގެ ސެޓަށް އައި ހުނަރުވެރި ޑައިރެކްޓަރަށް މާ ބޮޑު ބަދަލެއް ނާންނަ ކަމަށެވެ. އަދި ބަންސާލީ އަކީ ކުރިއެކޭ އެއްގޮތަށް މިހާރު ވެސް ފިލްމީ މަސައްކަތަށް ވަރަށް ޕެޝަނޭޓް ޑައިރެކްޓަރެއް ކަމަށް ބުންޏެވެ.
"އަބަދު ވެސް އެއީ މަސައްކަތަށް ވަރަށް ފޯކަސްޑް، ޑެޑިކޭޓްގެ ޑައިރެކްޓަރެއް." ބަންސާލީގެ 2005 ގެ ފިލްމު "ބްލެކް" ގައ އެސިސްޓަންޓް ޑައިރެކްޓަރެއްގެ ގޮތުގައި ވެސް މަސައްކަތްކުރި ރަންބީރް ބުންޏެވެ.
މިހާރު ޝޫޓިން ފަށާފައި އޮތް، އަސަރު ގަދަ ލޯބީގެ ވާހަކައެއް ކިޔައި ދޭނެ "ލަވް އެންޑް ވޯ" ގެ ބަތަލާ އަކީ ރަންބީރްގެ އަންހެނުން އަދި ބަންސާލީގެ އެންމެ ފަހުގެ ފިލްމު 2022 ގެ "ގަންގޫބާއި ކަތިއަވާޅީ" ގެ ވެސް ބަތަލާ އާލިއާ ބަޓެވެ. ދެހާސް ސައްބީހުގެ ކުރީކޮޅު ސިނަމާތަކަށް ގެންނަން ހަމަޖެހިފައިވާ "ލަވް އެންޑް ވޯ" ގެ ކާސްޓްގައި ވިކީ ކޯޝަލް ވެސް ހިމެނެ އެވެ.