އަންނަ އަހަރު ރިލީޒްވާނެ ބޮލީވުޑްގެ ފިލްމުތަކުގެ ތެރެއިން ވަރަށް ބޮޑު ކާސްޓެއް ފެންނާނެ "ހައުސްފުލް 5" ގެ ފަހު ޝެޑިއުލްގެ މަސައްކަތް ފަށައިފި އެވެ.
ޕްރޮޑިއުސަރު ސާޖިދު ނަދިއަދުވާލާގެ ނަދިއަދުވާލާ ގްރޭންޑްސަން އިން މި އަހަރުގެ އޮގަސްޓް މަހުގެ ތެރޭގައި ޝޫޓިން ފެށި މި ފިލްމަކީ އޭނަ 2010 އިން ފެށިގެން ގެނެސްދެމުން އަންނަ "ހައުސްފުލް" ކޮމެޑީ ފްރެންޗައިޒްގެ ފަސް ވަނަ ބައެވެ. މި ފަހަރުގެ ޑައިރެކްޓަރަކީ ތަރޫން މަންސުކާނީ އެވެ.
އޭނަ އަކީ ކަރަން ޖޯހަރްގެ ދަރުމާ ޕްރޮޑަކްޝަންގެ 2008 ގެ ކާމިޔާބު ފިލްމު "ދޯސްތާނާ" ގެ ޑައިރެކްޓަރެވެ. އެ ސްޓޫޑިއޯ އަށް އޭނަ ފަހުން "ޑްރައިވް" ކިޔާ ފިލްމެއް ވެސް ހެދި އެވެ.
އަންނަ އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ހައުސްފުލް 5" ގެ ކާސްޓްގައި މި ފްރެންޗައިޒްގެ އާންމު ދެ އެކްޓަރުން ކަމަށްވާ އަކްޝޭ ކުމާރާއި ރިތޭޝް ދޭޝްމުކާއި ޗަންކީ ޕާންޑޭގެ އިތުރުން ކުރީގެ ބައެއް ބައިތަކުގައި މަސައްކަތްކޮށްފައިވާ ބައެއް ތަރިންނާއި ކާސްޓާ މުޅިން އަލަށް ގުޅުނު ބައެއް ތަރިން ވެސް ހިމެނެ އެވެ.
އެގޮތުން ކްރޫޒް ޝިޕެއްގެ ދަތުރެއްގެ ތެރޭގައި ދިމާވާ ހެއްވާ މަޖާ ގިނަ ހާދިސާތަކެއް ފެންނާނެ "ހައުސްފުލް 5" ގެ ކާސްޓްގައި އަބީޝެކް ބައްޗަން، ޖެކްލިން ފެނާންޑޭޒް، ޑީނޯ މޯރިއާ، ނަރްގިސް ފަހްރީ، ސަންޖޭ ދަތު، ޗިތުރަންގަދާ ސިންގް، ނާނާ ޕަޓޭކަރް، ސޯނަމް ބަޖްވާ، ރަންޖީތު، ޖޯނީ ލީވާ، ޖެކީ ޝްރޮފް، ޝްރެޔަސް ތަލްޕަޅޭ އަދި ސައުންދަރިއާ ޝަރުމާ ހިމެނެ އެވެ.
މި ފިލްމު ސިނަމާތަކަށް ގެންނަން ހަމަޖެހިފައި ވަނީ އަންނަ އަހަރުގެ ޖޫން 6 ގަ އެވެ.
"ހައުސްފުލް" ފްރެންޗައިޒްގެ ހަތަރު ވަނަ ފަރުހާދު ސަމްޖީ ޑައިރެކްޓްކޮށް ގެނެސްދިނީ 2019 ގަ އެވެ.