މިހާރު ކަނޑައެޅިފައިވާ ރަށްތަކަށް ވުރެ ގިނަ ރަށްރަށުގައި ސިންތެޓިކް ޓްރެކްތައް އެޅުމަށް މަސައްކަތްކުރައްވާނެ ކަމަށް ސްޕޯޓްސް މިނިސްޓަރު ޢަބްދުﷲ ރާފިޢު ވިދާޅުވެއްޖެ އެވެ.
ރާއްޖޭގެ ހަތަރު ރަށެއްގައި ކުރީގެ ސަރުކާރުން އޮތީ ސިންތެޓިކް ޓްރެކް އަޅަން ނިންމައިފަ އެވެ. އެއީ ހަތަރު ސިޓީއެއްގަ އެވެ. އޭގެ ތެރޭގައި ހިމެނެނީ ފުވައްމުލަކާއި އައްޑޫ ހިތަދު އާއި ކުޅުދުއްފުށީގެ އިތުރުން ތިނަދޫގަ އެވެ.
މިނިސްޓަރު ރާފިއު ވިދާޅުވީ އެ ސަރަހައްދުތަކުގައި ޓްރެކުތަކުގެ އަމަލީ ކަންކަން ފަށައި ޕްރޮޖެކްޓް ކުރިއަށް ހިނގައިގަންނަން، މިދިޔަ ތިން އަހަރުގެ އެންމެ އެކަށީގެންވާ ގޮތަށް މަސައްކަތްކޮށްފައި ނެތް ކަމަށެވެ. ނަމަވެސް މި ސަރުކާރުން އެ މަސައްކަތް އަވަސްކުރެވޭނެ ގޮތްތައް ހޯދައި ސިންތެޓިކް ޓްރެކް އަޅަން ނިންމި ރަށްރަށުގެ ދަނޑުތަކުގެ މަސައްކަތް ފަށާފައިވާ ކަމަށް ވިދާޅުވި އެވެ.
ދައުލަތުގެ މީޑިއާ ޕީއެސްއެމްގައި ރާފިއު ވިދާޅުވީ ސިންތެޓިކް ޓްރެކް އަޅަން މިހާރު ކަނޑައަޅާފައިވާ ރަށްރަށުގެ އިތުރުން އިތުރު ރަށްތަކެއްގައި ވެސް ސިންތެޓިކް ޓްރެކް އެޅުމުގެ މަސައްކަތް ކުރާނެ ކަމަށެވެ..
އޭނަ ވިދާޅުވީ މިހާރު މާލޭ ސަރަހައްދުގައި އަޅާފައިވާ ދެ ސިންތެޓިކް ޓްރެކަށް ލިބިފައިވާ ގެއްލުންތައް ބަލައި އެތަންތަން މަރާމާތުކުރުމަ ށްވެސް ހަމަޖެހިފައިވާ ކަމަށެވެ.