އިންޑިއާގެ ކާސްޓަކާ އެކީ އެ ގައުމުގެ ވާހަކައެެއް ކިޔައި ދީގެން އޮސްކާގެ އެންމެ މޮޅު ފިލްމުގެ އިތުރުން ވެސް ގިނަ އެވޯޑްތަކެއް ހޯދި މަޝްހޫރު ފިލްމު "ސްލަމްޑޯގް މިލިއަނާ" ގެ ސީކްއެލްއެއް ނިންމައިފި އެވެ.
ހޮލީވުޑް ރިޕޯޓާ އިން ބުނި އިނގިރޭސި ޑައިރެކްޓަރު ޑެނީ ބޮޔެލް 2008 ގައި ގެނެސްދިން ފިލްމުގެ ދެވަނަ ބައެއް ހެދުމަށް މަސައްކަތް ކުރަނީ ބްރިޖް 7 ކިޔާ ޕްރޮޑަކްޝަން ހައުސްއަކުން ކަމަށެވެ. އެގޮތުން "ސްލަމްޑޯގް މިލިއަނާ" އުފެއްދި އިނގިރޭސިވިލާތުގެ ޕްރޮޑަކްޝަން ހައުސް، ސެލަޑޯ ފިލްމްސް އިން ފިލްމުގެ ރައިޓްސް ބްރިޖް 7 އިން ހޯދާފައިވާ ކަމަށް ބުންޏެވެ.
ދާދި ފަހުން އެމެރިކާގެ ލޮސް އެންޖެލިސްގައި އުފެއްދި ބްރިޖް 7 އަކީ ސްވަތީ ޝެޓީ އާއި ގްރާންޓް ކެޒްމަން ހިއްސާވާ ކުންފުންޏެކެވެ.
"ސްލަމްޑޯގް މިލިއަނާ" ގެ ދެވަނަ ބައެއް ހަދަން ތައްޔާރީތައްވަމުން ދިޔަ ނަމަވެސް މިއާ ބެހޭ އިތުރު ތަފުސީލުތަކެއް އަދި ހާމައެއް ނުކުރެ އެވެ. އެހެންވެ ފިލްމު ޑައިރެކްޓްކުރާނެ މީހަކާއި މަސައްކަތް ފަށާނެ އިރެއް ވެސް ނޭނގެ އެވެ.
އެންމެ 15 މިލިއަން ޑޮލަރުގެ ބަޖެޓަލުން ހެދި "ސްލަމްޑޯގް މިލިއަނާ" އަށް އާމްދަނީގެ ގޮތުގައި 378.4 މިލިއަން ޑޮލަރު ލިބުނެވެ. މި ފިލްމާ އެކީ މީގެ މައިގަނޑު ރޯލުތައް ކުޅުނު ދޭވް ޕަޓޭލް އާއި ފްރެއިޑާ ޕިންޓޯ ވެގެން ދިޔައީ ހޮލީވުޑުން ފުރުސަތުތައް ފަހިވެގެން ދިޔަ މަޝްހޫރު ތަރިންތަކަކަށެވެ.
"ސްލަމްޑޯގް މިލިއަނާ" އަށް ލިބުނު އޮސްކާ ތެރޭގައި އެންމެ މޮޅު ފިލްމުގެ އިތުރުން އެންމެ މޮޅު، ޑައިރެކްޓަރު، އެންމެ މޮޅު އެޑަޕްޓެޑް ސްކްރީންޕްލޭ، އެންމެ މޮޅު ސިނަމަޓޯގްރަފީ، އެންމެ މޮޅު އެެޑިޓިން، އެންމެ މޮޅު އޮރިޖިނަލް ސްކޯ، އެންމެ މޮޅު އޮރިނަލް ލަވަ/ޅެން އަދި އެންމެ މޮޅު ސައުންޑް މިކްސިން ހިމެނެ އެވެ.