ގާނޫނު އަސާސީއޭ ކިޔައިގެން އެމްޑީޕީން އުޅެނީ ގައުމު ހަލަބޮލިކުރަން ކަމަށް ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ޝުޖާއު މިހެން ވިދާޅުވެފައިމިވަނީ "ގާނޫނުއަސާސީގެ ދިފާއުގައި ރައްޔިތުންގެ" ނަމުގައި އެމްޑީޕީން އަންނަ މަހުގެ 10 ވަނަ ދުވަހު މާލޭގައި ބޮޑު ޖަލްސާއެއް ބޭއްވުމަށް ނިންމުމުންނެވެ.
އެކަމާ ގުޅިގެން ޝުޖާއު ވިދާޅުވީ އެމްޑީޕީން ޤާނޫނު އަސާސީއޭ ކިޔާ އުޅެނީ ޤައުމު ހަލަބޮލި ކުރަން ކަމަށާއި ކުރިން އުޅުނު ގޮތަށް އަލިފާން ބޯޅަ އުކައި، މިރުސް ފެން ފުލުހުންގެ މޫނަށް ޖަހައި، ދައުލަތުގެ އިމާރާތްތަކުގައި ހުޅުޖެހި ޒަމާން އިޔާދަ ކުރަން ނޫޅުމަށާއި އެކަން ދެން ނުވާނެ ކަމަށެވެ.
ޤާނޫނު އަސާސީއާ ހިލާފު ކަމެއް ކޮށްފިނަމަ ދާނީ ކޯޓަށް ކަމަށާއި މަގުމަތީގައި އެމްޑީޕީގެ ބޭފުޅުން ކޯޓު ހަދައިގެން އުޅުނު ޒަމާން މާޒީވެފައިވާ ކަމަށް ޝުޖާއު ވިދާޅުވި އެވެ.
"ޤައުމަށް ބިލިއަން ޑޮލަރުގެ މަޝްރޫޢުތައް އަންނަން ފެށި ވަގުތު މަގުމަތި ހަލަބޮލިކޮށް އެ ފުރުޞަތުން ދިވެހީން މަހުރޫމު ކުރިގޮތަށް ދެން އެކަމެއް ނުވާނެ،" ޝުޖާއު ވިދާޅުވި އެވެ.
އެމްޑީޕީން ބުނީ މި ޖަލްސާ ބާއްވަނީ ގިނަ ބަޔަކު ބުރަ މަސައްކަތުން ހޯދި ގާނޫނު އަސާސީ އަށް އެއްވެސް ބެލުމެއް އަދި ރައްޔިތުން ކައިރިން އަހާލުމެއް ވެސް ނެތި ބަދަލުތައް ގެންނާތީ އާއި ފަރުދީ އަދި އަސާސީ މިނިވަންކަން ސަރުކާރުން ނިގުޅައިގަންނަމުންދާތީ އެކަމާ ދެކޮޅަށް އަޑު އުފުލުމުގެ ގޮތުން ކަމަށެވެ.
މި ޖަލްސާގައި ބައިވެރިވުމަށް ރާއްޖޭގެ ހުރިހާ ރައްޔިތުންނަށް އެމްޑީޕީން ވަނީ ދައުވަތު ދީފަ އެވެ.
"ގާނޫނުއަސާސީގެ ދިފާއު" ގެ ނަމުގައި އެމްޑީޕީން ޖަލްސާއެއް މި ބާއްވަނީ މި ސަރުކާރުން ގާނޫނުއަސާސީ އަށް ދާދިފަހުން ގެނައި ކުއްލި އަވަސް އިސްލާހުތަކާ ގުޅިގެން ގިނަ ބަޔަކު ކަންބޮޑުވުން ފާޅުކުރަމުން އަންނަ ދަނޑިވަޅެއްގަ އެވެ.