ޓޫރިޒަމް އެވޯޑަށް މުއްދަތު އިތުރުކޮށްފި

މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު އަނެއްކާވެސް އިތުރުކޮށްފި އެވެ.

މިއީ މި މުއްދަތު އިތުރުކުރި ދެވަނަ ފަހަރެވެ.

މޯލްޑިވްސް ޓޫރިޒަމް އެވޯޑަށް ނަން ހުށަހަޅަން ދިން މުއްދަތު އެންމެ ފުރަތަމަ ހަމަވީ މިދިޔަ މަހުގެ 14 އަށެވެ. އޭގެ ފަހުން އެ މުއްދަތު މި މަހުގެ 28 އަށް އިތުރުކުރި އެވެ.

ޓޫރިޒަމް މިނިސްޓްރީން ބުނީ މިހާރު އެވޯޑަށް ނަން ހުށަހެޅުމުގެ ފުރުސަތު އަންނަ މަހުގެ 7 އާ ހަމަށް އޮންނާނެ ގައެވެ.

އެވޯޑަށް ކުރިމަތިލާބް ހުޅުވާލާފައި ވަނީ ރިސޯޓުތަކާއި، ހޮޓާތަކާއި، ގެސްޓުހައުސްތަކާއި، ސަފާރީތަކާއި، ޓްރެވެލް އެޖެންސީތަކަށެވެ. އެގޮތުން ފަސް ކެޓަގަރީއަކުން 23 އެވޯޑެއް ދޭން ހަމަޖެހިފައިވެ އެވެ. އެވޯޑަށް އެޕްލިކޭޝަން ހުށަހަޅަން ޖެހެނީ އޮންލައިންކޮށެވެ.

އެވޯޑު ދިނުމުގައި ބަލާނީ ޖޫން 1، 2023 އިން މެއި 31، މެއި 2024 ގެ ނިޔަލަށްކޮށްފައިވާ މަސައްކަތްތަކަށެވެ.

ރާއްޖޭގެ ޓޫރިޒަމަށް 50 އަހަރުވުމާ ގުޅިގެން 2022 ގައި ތައާރަފުކުރި މޯލްޑިވްސް ޓޫރިޒަމް އެވޯޑް މިދިޔަ އަހަރު ފަސް ދާއިރާއަކުން 59 އެވޯޑަކަށް ހުޅުވާލިއެވެ. އަދި އެކި ކެޓަގަރީތަކުން 88 ފަރާތަކުން 225 އެޕްލިކޭޝަން ލިބުނު އިރު، 31 ފަރާތަކަށް އެވޯޑު ދީފައިވެ އެވެ.