މިނިވަން އަދި ތަހުޒީބު ޤައުމެއްގެ ގޮތުގައި ރާއްޖެ ދެމިއޮތުމަށްޓަކައި އެންމެ މުހިންމު ކަމަކީ، ދިވެހި ޤައުމިއްޔަތު ނެގެހެއްޓުންކަމުގައި ނައިބު ރައީސް ޙުސައިން މުޙައްމަދު ލަޠީފް ވިދާޅުވެއްޖެ އެވެ.
ބަހާ މިނިސްޓްރީން އިންތިޒާމުކޮށްގެން މިއަދު ގައުމީ ޔުނިވަސިޓީގައި ފެށި ގައުމިއްޔަތު ފެށި އިސްވަރުގެ ފުރަތަމަ މަހާސިންތާ "ކަޅުއޮށްފުންމި: ދިވެހި ޤައުމިއްޔަތުގެ ދަރުބާރު" ހުޅުވުމުގެ ރަސްމިއްޔާތުގައި އެ މަނިކުފާނު ވިދާޅުވީ މި މަހާސިންތާ އަކީ ދިވެހީންގެ ޤައުމިއްޔަތާއި އަމިއްލަވަންތަކަން ރައްކާތެރި ކުރުމަށާއި އެކަމަށް ހޭލުންތެރިކަން އިތުރުކުރުމަށް ކުރިއަށް އެޅޭ ވަރަށް ހަރުދަނާ، އަދި އީޖާބީ ފިޔަވަޅެއް ކަމަށެވެ.
ނައިބު ރައީސް ވިދާޅުވީ މަހާސިންތާގައި ދިވެހި ޤައުމިއްޔަތާ ގުޅުން ހުރި، އަދި ދިވެހީންގެ އަމިއްލަވަންތަކަމާ ގުޅުންހުރި ވަރަށް މުހިންމު ދާއިރާތަކަކުން މަޢުލޫމާތު ހުށަހެޅި ޢިލްމީ މަޝްވަރާތަކެއް ކުރެވި އައު އީޖާދީ ވިސްނުންތަކެއް ލިބިގެން ދާނެ ކަމަށް ޔަޤީން ކުރައްވާ ކަމަށެވެ.
"އަޅުގަނޑު ޤަބޫލުކުރާ ގޮތުގައި މިނިވަން އަދި ތަހުޒީބު ޤައުމެއްގެ ގޮތުގައި އެތައް ހާސް އަހަރަކަށް، ރާއްޖެ ދެމިއޮތުމަށްޓަކައި އެންމެ މުހިންމު ކަމަކީ ދިވެހި ޤައުމިއްޔަތު ނެގެހެއްޓުން،" އެ މަނިކުފާނު ވިދާޅުވި އެވެ. "ދިވެހިންގެ ޤައުމިއްޔަތާ މެދު ފަޚުރުވެރިވާ ބަޔަކަށް އަޅުގަނޑުމެން އެންމެން ވެސްވުން."
ނައިބު ވިދާޅުވީ ދިވެހީންނަކީ ވަރަށް ނަސީބުވެރި ބައެއް ކަމަށާއި ރާއްޖޭގެ ޤުދުރަތީ ރީތިކަމުގެ ވާހަކަ ދުނިޔޭގެ އެކި ކަންކޮޅުތަކުގައި މަޝްހޫރުވެފައިވާ ކަމަށެވެ. އަދި ދިވެހި ބަހުގެ ޗާލުކަމާއި ރާއްޖޭގެ ޤައުމިއްޔަތުގެ ބަހާތަކަކީވެސް ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށް ދޭން ޖެހޭ ކަމަށް ވިދާޅުވިއެވެ.
މީގެ އިތުރުން ރާއްޖޭގެ އަމާންކަމާއި ދިވެހީންގެ އެކުވެރިކަމާއި ޚުލްގު ހެޔޮކަން މި ޤައުމަށް އަންނަ ކޮންމެ ޓޫރިސްޓަކަށް ޢަމަ ލީގޮތުން ދެއްކުމަށް ބާރުއެޅުއްވި އެވެ.
ނައިބު ވިދާޅުވީ ރައީސް ޑރ. މުޙައްމަދު މުޢިއްޒު، ދިވެހީންގެ އަމިއްލަވަންތަކަމާއި ޤައުމިއްޔަތު ހިމާޔަތް ކުރެއްވުމަށް ވަރަށް ބޮޑު ސަމާލު ކަމެއް ވެސް ދެއްވާ ކަމަށެވެ. އެގޮތުން ތަޢުލީމީ މަންހަޖުގައި ޤައުމިއްޔަތު، ވަކި މާއްދާއެއްގެ ގޮތުގައި ހިމެނުއްވުމާއި، ދިވެހި ދިދައަށާ، ދިވެހީންގެ ޤައުމީ ސަލާމަށް ޚާއްޞަ އިސްކަމެއް، އެމަނިކުފާނު ދެއްވާކަން ފާހަގަކުރެއްވި އެވެ. އެހެންވެ ދިވެހި ޤައުމިއްޔަތުގެ ކޮލެޖް ޤާއިމުކުރައްވައި، ޤައުމިއްޔަތުގެ އިސްވަރު އުފައްދަވައި، ޤައުމީ ކަންކަން އެންމެ އުހަށް ނަންގަވަން، ރައީސް ކުރައްވަމުން އެ ގެންދަވާ މަސައްކަތްޕުޅަށް އެންމެހާ ދިވެހީން އެއްބާރުލުން ދިނުމަށް ގޮވާލެއްވި އެވެ.
މިއަދު ފެށީ މަހާސިންތާ އަކީ ދިވެހީންގެ އެއްބައިވަންތަކަމާއި ދެމިތިބުމާ މެދު ވިސްނައި، ފިކުރުކުރުމުގެ ބައްދަލުވުމެކެވެ.