އިންޑިއާގެ އެކްޓަރު ޝަރަދުގެ މައްޗަށް ކުރެވޭ ޖިންސީ ގޯނާގެ މައްސަލައެއް ބަލަން ފަށައިފި އެވެ.
މީޑިއާތަކުން ބުނީ 48 އަހަރުގެ އެކްޓަރުގެ މައްޗަށް ޖިންސީ ގޯނާގެ ތުހުމަތުކުރީ ޕްރޮފެޝަނަލް ކަމަކާ ގުޅޭ ގޮތުން އަންހެނަކަށް ގެއަށް ދައިވަތު ދީގެން ގެއަށް ގެންގޮސް، ކޮޓަރި އަށް ވައްދައިގެން ގަޔަށް އަތްލަން އުޅުނު ކަމަށް ބުނެ ކަމަށެވެ. ނަމަވެސް އެ މައްސަލަ މުމްބާއީގެ ޚާރް ފުލުހުންނަށް ރިޕޯޓްކުރި އަންހެން މީހާއާ ބެހޭ އެއްވެސް ތަފުސީލެއް ހާމަކޮށްފައެއް ނުވެ އެވެ.
އޭނަ ހުށަހެޅި މައްސަލައާ ހަވާލާދީ މީޑިއާތަކުން ބުނީ ޝަރަދު ބުނި ތަނަށް އަންހެން މީހާ ދިޔަ އިރު، އެއީ އޭނަގެ ގެކަން ކުރިން ނޭނގޭ ކަމަށާއި ގެއަށް ދިއުމާ އެކީ ކޮޓަރި އަށް ވައްދައިގެން ފުރަގަހުން ބައްދާލައި ގަޔަށް ޖިންސީ ގުޅުން ހިންގަން މަސައްކަތްކުރި ކަމަށެވެ.
ނަމަވެސް ސަލާމަތްވީ އޭނަ ކޮއްޕާލައި ދުވެ، ގެއިން ނުކުމެގެން ކަމަށް އަންހެން މީހާ ހުށަހެޅި މައްސަލައިގައި ބުނެފައިވެ އެވެ. މި މި މައްސަލަ މިހާރު ފުލުހުން ތަހުގީގު ކުރަމުން ދިޔަ ނަމަވެސް ތަހުގީގާ ބެހޭ އެއްވެސް މައުލޫމާތެއް އަދި ހާމައެއް ނުކުރެ އެވެ.
ޝަރަދަކީ 1994 ގެ މިސް ޔުނިވާސް ސުޝްމިތާ ސެން ބޮލީވުޑަށް ތައާރަފުކުރި 1996 ގެ ފިލްމު "ދަސްތަކް" އެއް ބަތަލެވެ. އޭނަ ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ތަމަންނާ"، "ޖޯޝް"، "ޖާނީ ދުޝްމަން"، "ލަކްޝް" އަދފި "ޖޭ ހޯ" ހިމެނެ އެވެ.
ޝަރަދު އެންމެ ފަހުން ފެނިފައި ވަނީ 2022 ގެ "ނޯ މީންސް ނޯ" އިންނެވެ.