ރާއްޖޭގެ 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލުމުގެ މަސައްކަތްކޮށް ދޭނެ ރާއްޖެ އާއި ބައިނަލްއަގުވާމީ ކޮންސަލްޓެންސީ ފާމެއް ހޯދަން ފިނޭންސް މިނިސްޓްރީން އަލުން އިއުލާންކޮށްފި އެވެ.
މި މަހުގެ ކުރީކޮޅު ކުރި އިއުލާން ބާތިލުކޮށް، އަލުން މިއަދު އެކަމަށް ކުރިމަތިލާން ހުޅުވައިލީ ކުރިން ކުރި އިއުލާނަށް އިސްލާހެއް ގެނައުމަށް ފަހު ކަމަށް މިނިސްޓްރީން ބުންޏެވެ.
އެހެންވެ މިހާރު ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް އީއައިއޯ) ހުށަހަޅަން ހުޅުވާލާފައި ވަނީ އަންނަ މަހުގެ 7 އާ ހަމައަށެވެ.
ފިނޭންސް އިން ބުނީ މި މަސައްކަތްތަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޕްރޮޕޯސަލް ހުށަހެޅުމުގެ ފުރުސަތު ދޭނީ ޝޯޓްލިސްޓް ކުރެވޭ ފަރާތްތަކަށް ކަމަށެވެ.
ފިނޭންސް މިނިސްޓްރީން ބުނީ މި މަސައްކަތުގެ މަގުސަދަކީ ހައުސިން މިނިސްޓްރީގެ ބެލުމުގެ ދަށުން ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިގުތިސާދީ، އިޖުތިމާއީ، ތިމާވެށި އަދި އާބަން ޑިވެލޮޕްމަންޓް ގައުމީ ތަރައްގީގެ ޕްލޭނެއް އެކުލަވާލުމެވެ. މި ޕްލޭންގައި ނެޝަނަލް ޑިވެލޮޕްމަންޓް ޕްލޭން ފައިދާ ހުރި ގޮތެއްގައި ތަންފީޒު ކުރުމާއި މޮނިޓާކުރުމާއި އިވެލުއޭޓްކުރެވޭނެ ނިޒާމު ހިމަނަން ވާނެ ކަމަށް މިނިސްޓްރީގެ އިއުލާނުގައިވެ އެވެ.
ރާއްޖޭގެ 20 އަހަރުގެ ތަރައްގީގެ ގައުމީ ޕްލޭނަކީ ޔޫއެންޑީޕީ އާއި އޮސްޓްރޭލިއާ ސަރުކާރުގެ އެހީގައި އެއް އަހަރުގެ ދުވަހުގެ ތެރޭގައި އެކުލަވާލައިި ނިންމަން އަމާޒު ހިފާފައިވާ ޕްލޭނެކެވެ. މި ޕްލޭން އެކުލަވާލުމުގެ މަސައްކަތުގެ ތެރެއިން ގާނޫނީ ބާރުވެރިކަން ހޯދުމަށް ގައުމީ ތަރައްގީގެ ގާނޫނުގެ ބިލެއް އެކުލަވާލައި، އެ ޕްލޭން ދެމެހެއްޓިނިވި ގޮތެއްގައި ތަންފީޒު ކުރުމަށް ބޭނުންވާ އިތުރު ބާރުވެރިކަން ހޯދުމަށް ގާނޫނުއަސާސީ އަށް މާއްދާއެއް އިތުރު ކުރުމަށް ވެސް ހަމަޖެހިފައިވެ އެވެ.
މި ޕްލޭންގެ މަސައްކަތް ފެށުމަށް މިދިޔަ މަހުގެ 6 ގައި ބައްދަލުވުމެއް ވެސް ބޭއްވި އެވެ. ގައުމީ ތަރައްގީގެ 20 އަހަރުގެ ޕްލޭނަކީ ރައީސް ޑރ. މުހައްމަދު މުއިއްޒުގެ ވައުދެކެވެ.