މިހާރު ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގެ ސަބަބުން އައްޑޫގެ ރަށްތަކަށް ވަރަށް ބޮޑެތި ގެއްލުންތަކެއް ވެއްޖެއެވެ.
ރޭ ދަންވަރުން ފެށިގެން ބާރު ވަޔާއި އެކު ވާރޭ ވެހުމުގެ ސަބަބުން ހިތަދޫގެ 11 ގެއެއްގެ ފުރާޅު އެެއްލާލާފައިވާ އިރު މީދޫ، ސަންރޭގެ ފުރާޅުވެސް ވަނީ ވަޔާއި އެކު މުޅިން އެއްކޮށް އެއްލާލާފައެވެ.
މެޓް އޮފީހުން ކުރިން ބުނެފައިވަނީ ކޮޅިގަނޑުގައި 40 މޭލާއި 65 މޭލުގެ ބާރުމިނުގައި ވައިޖެހޭނެކަމަށެވެ. އެގޮތުން ބާރު ވަޔާއި އެކު އައްޑޫގެ ގިނަ ރަށްތަކުން ރުއް ގަސް ވެއްޓި ބައެއް ގޭގޭގެ ފާރުތައް ވަނީ ވެއްޓިފައެވެ.
މި ވިއްސާރައިގައި ހުޅުދޫ މަގުމަތީގައި ޖަހާފައިވާ މަގު ބައްތިތައް ވެއްޓި، ބައެއް ސަރަހައްދުތަކުން ކަރަންޓް ކަނޑައިގެން ގޮސްފައިވެއެވެ.
އަދި ހިތަދޫ ރޯޔަލް ޕާމް ރެސްޓޯރެންޓަށްވެސް ވަނީ ބޮޑެތި ގެއްލުން ލިބިފައެވެ.
ވާރޭ ވެހި ފެންގަދޫ ބޮޑުވެ، ގޭގެއަށް ފެންވަންނާތީ ހިތަދޫ ފަޔާ އެންޑް ރެސްކިއު ސާވިސް އާއި އެމްއެންޑީއެފް ސަދަން އޭރިއާ އަދި ފުލުހުން ވެލި ބަސްތާ ޖެހުމާއި، ފެން ހިއްކުމުގެ މަސައްކަތް ދަނީ ކުރަމުންނެވެ.