ޕްރެޒިޑެންޓް ކަޕްގެ ދެވަނަ މެޗްގައި ވިކްޓްރީ އާއި ދެކޮޅަށް މިއަދު ހަވީރު ކުޅޭ މެޗަށް ފުރިހަމައަށް ތައްޔާރުވެފައިވާ ކަމަށް އީގަލްސްގެ ކޯޗު އިހްސާން އަބްދުލް ޢަނީ (ސާންތި) ބުނެފިއެވެ.
ސާންތި ބުނީ ޓީމްގެ އިންޖަރީގެ މައްސަލައެއް ނެތް ކަމަށާއި، މުބާރާތަށް ރަގަޅަށް ތައްޔާރުވެފައިވާ ކަަމަށެވެ. އަދި ޓީމްގެ ހުރިހާ ކުޅުންތެރިންވެސް ތިބީ ރަނގަޅު ފޯމެއްގައި ކަމަށް ސާންތި ބުންޏެވެ.
"ކެއުން، އެކަމަޑޭޝަން ހުރިހާ ކަމެއް މިކޮޅުގައި މިދަނީ ވަރަށް ރަނގަޅަށް. އެއްްވެސް މަައްސަލައެއް ނެތް. އަޅުގަނޑުމެން މިތިބީ މިއަދުގެ މެޗާއި އެކު ރަނގަޅު ފެށުމަކުން މުބާރާތް ފަށައިގަންނަން"
ސާންތި ބުނީ އީގަލްސް އަންނަނީ ރާއްޖޭގެ ބޮޑެތި ޓީމުތަކާ ރަނގަޅު ވާދައެއް ކުރަމުން ކަމަށާއި، މި ފަހަރުގެ ޕްރެޒިޑެންޓްސް ކަޕުގެ ތަށްޓާ ހަމަޔަށް އެ ޓީމަށް ދެވޭނެ ކަމުގެ އުއްމީދު ވަރަށް ބޮޑު ކަމަށެވެ.
ސާންތީ ބުނީ ޕްރެޒިޑެންޓްސް ކަޕް މާލޭން ބޭރުގައި ކުޅެން ޖެހުމަކީ މައްސަލައެއް ނޫން ކަމަށާއި އެކޮމަޑޭޝަނާއި ކެއުމާ މެދު ޝަކުވާކުރުމަކީ މާ ކުރީގެ އުސޫލެއް ކަމަށެވެ. ނަމަވެސް މުބާރާތް އައްޑޫގައި އިޝްތިހާރު ކުރެވިފައި ނެތުމުން އެކަމުގެ ކަންބޮޑުވުން ސާންތި ފާޅު ކުރިއެވެ.
ވިކްޓްރީ އާއި އީގަލްސް މިއަދު ބައްދަލު ކުރާއިރު އިއްޔެ މާޒިޔާ އާއި ވެލެންސިއާ ބައްދަލު ކުރި މެޗް 2-0 ލަނޑުން ކާމިޔާބްކޮށް މާޒިޔާގެ ފެށުން މިވަނީ ރަނގަޅު ކޮށްފައެވެ.
މިއަދުގެ މެޗް ވެސް ފަށާނީ ހަވީރު 4 ޖަހާއިރު އައްޑޫ ސްޓޭޑިއަމްގައެވެ.