އައްޑޫ ސްޓޭޑިއަމްގައި މިހާރު ކުރިއަށްދާ ޕްރެޒިޑެންޓްކަޕް ފުޓްބޯޅަ މުބާރާތު ގްރޫޕް ބީގެ އެއްވަނަ ޓީމަކަށް މާޒިޔާ ހޮވުނު އިރު އެ ގްރޫޕުން ދެވަނަ ޓީމެއްގެ ގޮތުގައި އީގަލްސް ސެމީ ފައިނަލް ކަށަވަރު ކޮށްފިއެވެ.
މި ގްރޫޕްގެ ސެމީއަށްދާ އެއްވަނަ އަދި ދެވަނަ ޓީމް ކަށަވަރުވީ މިއަދު ކުޅުނު އީގަލްސް މާޒިޔާ މެޗް 1-1 ލަނޑުން އެއްވަރުވުމުންނެވެ.
މިއަދުގެ މެޗްގައި ލަނޑު ޖަހާނެ މާ ތަނަވަސް ފުރުސަތުތަކެއް ދެ ޓީމުން ކުރެ ޓީމަކަށް ލިބިފައި ނުވެއެވެ.
މެޗްގެ ފުރަތަމަ ލަނޑު 42 ވަނަ މިނިޓްގައި އީގަލްސްއަށް ކާމިޔާބްކޮށްދިނީ އެޓީމްގެ ކެޕްޓަން އިސްމާއިލް އީސާ(މެސީ)އެވެ. މި ޕެނަލްޓީއަކީ މާޒިޔާގެ ޑިފެންޑަރ ޓޯނީ އިސްމާއީލް އީސާއަށްކުރި ފައުލަކަށް ލިބުނު ޕެނަލްޓީއެކެވެ.
މެޗްގެ ފުރަތަމަ ހާފް ނިމުނީ 1-0 ލަނޑުން އީގަލްސް ކުރީގައި އޮވެގެންނެވެ.
މާޒިޔާއިން އެއްވަރު ކުރި ލަނޑު ޖެހީ މެޗްގެ 83 ވަނަ މިނިޓްގައި އަސަދުއްﷲއަށް ކުރި ފައުލަކަށް ލިބުނު ޕެނަލްޓީއަކުންނެވެ.
މި ލަނޑު މާޒިޔާއަށް ޖަހައިދިނީ ބަދަލު ކުޅުންތެރިއެއްގެ ގޮތުގައި ނިކުތް މުހައްމަދު އުމައިރުއެވެ.
މާދަމާ ކުޅޭނީ މިގްރޫޕުން ކަޓާފައިވާ ވެލެންސިއާ އަދި ވިކްޓްރީގެ މެޗެވެ.