އިންޑިއާ އާއި ޕާކިސްތާނުން ބަދަލު ކުރަމުންދާ ހަމަލާތައް ހުއްޓާލަން އެއްބަސްވުމުން ދިވެހި ސަރުކާރުން މަރުހަބާ ކިޔައިފި އެވެ.
ފޮރިން މިނިސްޓަރު ޑރ. އަބްދުﷲ ހަލީލު ވިދާޅުވީ ހަމަލާތައް ހުއްޓާލުމަށް ދެ ގައުމުން ވެސް އެއްބަސްވުމުން މަރުހަބާ ކިޔާ ކަމަށާއި ދެ ޤައުމުގެ ވެރިންނަށް ސުލްޙަވެރިކަމާއި މަޝްވަރާގެ މަގު ޚިޔާރުކުރުމަށްޓަކައި، އަދި ސަރަޙައްދީ އިސްތިޤްރާރުކަން ޤާއިމުކުރުމަށް އެޅި ފިޔަވަޅުތަކަށް ތައުރީފުކުރާ ކަމަށެވެ.
I welcome the announcement of an immediate ceasefire between #India and #Pakistan. We commend the leadership of both countries for choosing the path of peace & dialogue, and for taking steps towards regional stability.
— Abdulla Khaleel (@abkhaleel) May 10, 2025
އެމެރިކާގެ ރައީސް ޑޮނަލްޑް ޓްރަމްޕް މިއަދު ސޯޝަލް މީޑިއާ ޕޯސްޓެއްގައި ވިދާޅުވީ ދެ ގައުމުން ހަމަލާތައް ހުއްޓައިލަން އެއްބަސްވީ އެމެރިކާ މެދުވެރިވެގެން ދެ ގައުމާ އެކު ކުރެވުނު މަޝްވަރާތަކުން ކަމަށެވެ.
އެހެންވެ ދެ ގައުމުގެ އެ ނިންމުމަށް ވަރަށް މަރުހަބާ ދަންނަވާ ކަމަށް ވެސް ވިދާޅުވި އެވެ.
އިންޑިއާ އާއި ޕާކިސްތާނާ ދެމެދު ނުތަނަވަސްކަން އުފެދި "ހަނގުރާމައެއްގެ ތުންފަތްމައްޗަށް ވެއްޓުނީ" މިދިޔަ މަހުގެ 22 ގައި ކަޝްމީރުގެ އިންޑިއާ ވީ ފަޅީގެ ޕަހަލްގާމަށް ހަތިޔާރު އެޅި ޖަމާއަތަކުން ދިން ހަމަލާތަކެއްގައި 26 މީހަކު މަރައިލުމާ ގުޅިގެންނެވެ. އެ ހާދިސާ ޕާކިސްތާނުގެ ބޮލުގައި އަޅުވައި، "އޮޕަރޭޝަން ސިންދޫރު" ގެ ނަމުގައި އިންޑިއާ އިން ވަނީ އޮޕަރޭޝަނެއް ފަށައި މި މަހުގެ 8 ވަނަ ދުވަހު ޕާކިސްތާނަށް ހަމަލާތަކެއް ދީފަ އެވެ.
އޭގެ ފަހުން ރައްދުގައި ޕާކިސްތާނުން ދޭން ފެށި ހަމަލާތަލާ އެކު، ދެ ގައުމުން ވެސް ހަމަލާތައް ބަދަލުކޮށް، ދެ ގައުމުން ވެސް ބަޔަކު މަރުވެފައިވެ އެވެ.